ސަރުކާރުގެ އުސޫލާ ހިލާފަށް އަމަލު ކުރި މައްސަލައެއް ފެންމަތިވި އިނގިރޭސިވިލާތުގެ ހޯމް މިނިސްޓަރު ސުއެލާ ބްރޭވާމޭން އިސްތިއުފާ ދެއްވައިފި އެވެ.
އޭނާއަކީ މި ހަަފުތާ ތެރޭގައި އިސްތިއުފާ ދެއްވި ދެ ވަނަ އިނގިރޭސި ކެބިނެޓު މެމްބަރެވެ. މީގެ ކުރިން އިސްތިއުފާ ދެއްވީ ފިނޭންސް މިނިސްޓަރު ކްވާސީ ކްވާޓެންގް އެވެ.
"އަޅުގަނޑަށް ގޯސް ހެދިއްޖެ. އެކަމުގެ ޒިންމާ ނަގާނަން. އެހެންވީމާ އިސްތިއުފާ ދޭން ނިންމައިފިން،" ބޮޑު ވަޒީރު ލިޒް ޓްރަސްއަށް ބްރޭވާމޭން ފޮނުއްވި ސިޓީގައިވެ އެވެ.
އޭނާ ވިދާޅުވީ ރަސްމީ ލިޔުމެއް އޭނާގެ އަމިއްލަ އީމެއިލް އެކައުންޓުން ޕާލިމެންޓުގެ މެމްބަރަކަށް ފޮނުއްވި ކަމަށާއި އެއީ އުސޫލާ ހިލާފު އަމަލެއް ކަމަށެވެ.
އިސްތިއުފާ ދެއްވަމުން އޭނާ އިތިރަށް ވިދާޅުވީ ޓްރަސްގެ ސަރުކާރުގެ މިސްރާބާ މެދު ކަަންބޮޑުވާ ކަމަށާއި ވައުދުތަކާ ހިލާފަށް އަމަލުކުރަމުންދާ ކަމަށެވެ.
ބްރޭވާމޭންގެ ބަދަލުގައި އާ ހޯމް މިނިސްޓަރުކަމަށް އައްޔަނު ކުރެއްވީ ކުރީގެ ޓްރާންސްޕޯޓް މިނިސްޓަރު ގްރާންޓް ޝެޕްސް އެވެ.
