ނޫސްވެރިކަމުގެ އެންމެ ޝަރަފުވެރި ޕުލިޓްޒާ އެވޯޑް ހާސިލްކުރި އިންޑިއާގެ ފޮޓޯ ޖާނަލިސްޓެއް އެމެރިކާއަށް ފުރަން މަސައްކަތް ކުރުމުން ދިއްލީ އެއާޕޯޓުގައި ހިފަހައްޓައިފި އެވެ.
ސަންނަ އިރުޝާދު މައްޓޫއަށް އެވޯޑް ލިބުނީ ކޮވިޑް-19 ބަލިމަޑުކަމުގެ ކަވަރޭޖާ ގުޅިގެންނެވެ. އޭނާއަށް އެމެރިކާއަށް ފުރަން އުޅުނީ އެވޯޑު ހަފުލާގައި ބައިވެރިވުމަށެވެ.
މައްޓޫ ބުނީ "ސައްހަ ވިސާ އާއި ޓިކެޓް" އޮތް ނަމަވެސް، ފުރުން ހުއްޓުވި ކަމަށެވެ. އޭނާ ފުރުން ހުއްޓުވި ސަބަބާ މެދު އިންޑިއާ ސަރުކާރުން މިހާތަނަށް ވަކި އެއްޗެއް ނުބުނެ އެވެ.
ޖައްމު އަދި ކަޝްމީރުގެ ފުލުހުންނާ ހަވާލަދީ ޕީޓީއައި ނޫހުން ބުނީ އިންޑިއާއިން ފުރުން މަނާ މީހުންގެ ލިސްޓުގައި އޭނާގެ ނަން ހިމެނޭ ކަމަށެވެ.
މައްޓޫ ބުނީ ފާއިތުވި ހަތަރު މަހުގެ ތެރޭގައި ދެ ފަހަރަށް އޭނާ އިންޑިއާއިން ފުރުން ހުއްޓުވި ކަމަށެވެ. އޭނާ ފުރުން މަނާ ކުރާ ސަބަބާ މެދު ސުވާލު ކުރުމުން އޮފިޝަލުން އެއްވެސް އެއްޗެއް ނުބުނެ އެވެ.
މި އަހަރުގެ ތެރޭގައި ގިނަ އަދަދެއްގެ ނޫސްވެރިންނާއި އެކްޓިވިސްޓުންނާ މެދު އިންޑިއާއިން އެގޮތަށް އަމަލުކޮށްފައިވެ އެވެ. އެގޮތުން ބަޔެއް މީހުން ފުރުން މަނާކުރި އިރު، އަނެއް ބައި މީހުން އެތެރެވުން މަނާކުރި އެވެ.
