ފާއިތުވި ހަފުތާއިން ފެށިގެން ރަޝިއާއިން ދެމުންދާ ހަމަލާތަކާ ގުޅިގެން ޔޫކްރެއިންގެ ހާހަކަށް ވުރެ ގިނަ އަވަށަށް ކަރަންޓު ނުލިބޭ ކަމަށް އޮފިޝަލުން ބުނެފި އެވެ.
އެމެޖެންސީ ހިދުމަތްތަކުގެ ތަރުޖަމާނު އޮލެކްސެންޑަރް ހޮރުންޒީ ވިދާޅުވީ އޮކްޓޯބަރު މަހުގެ ތެރޭގައި ދިން ރޮކެޓް އަަދި ޑްރޯން ހަމަލާތަކުގައި 70 އަށް ވުރެ ގިނަ މީހުން މަރުވެފައިވާ ކަމަށެވެ.
ރައީސް ވޮލޮޑިމިރް ޒެލެންސްކީ ވިދާޅުވީ ފާއިތުވި އަށް ދުވަހުގެ ތެރޭގައި ދިން ހަމަލާތަކުގައި ޔޫކްރެއިންގެ ހަކަތަ ފޯރުކޮށްދޭ ސްޓޭޝަންތަކުގެ 30 ޕަސެންޓް ސުންނާފަތިވެފައިވާ ކަމަށެވެ.
އަންގާރަ ދުވަހުގެ ހަމަލާތަކާ ގުޅިގެން ވެރިރަށް ކިޔެވްގެ ބައެއް ހިސާބުތަކަށް ވެސް ފެނާއި ކަރަންޓުގެ ހިދުމަތް ނުލިބެ އެވެ.
ސެޕްޓެމްބަރު މަހު ބިމުގެ ބައެއް ސަރަހައްދުތައް ރަޝިއާއަށް ގެއްލުމުން، އޮކްޓޯބަރު މަސް ފެށުމާ އެކު ހަމަލާތައް ވަރުގަދަކޮށް އަމާޒު ކުރަމުން ދަނީ ސިޓީތަކަށެވެ.
ސިޓީތަކުގެ މުހިއްމު އިންފްރާސްޓްކްޗާއަށް ޓާގެޓުކޮށްފައިވާ އިރު، ގިނަ އަދަދެއްގެ ހަކަތަ ފޯރުކޮށްދޭ ސްޓޭޝަންތަކަށް ދަނީ ހަމަލާތައް ފޮނުވަމުންނެވެ.
ޔޫކްރެއިނުގެ ހަކަތައާ ބެހޭ ކުންފުނިން އެ ތަންތަން މަރާމާރު ކުރަމުން ދިޔަ ނަމަވެސް، ހަމަލާތައް ނުހުއްޓޭ ނަމަ ކަރަންޓުގެ ހިދުމަތް މެދުކެނޑޭނެކަމުގެ ބިރު އެބަ އޮތެވެ. އެ ކުންފުނިން ރައްޔިތުންނަށް ގޮވާލީ ވީހާވެސް ބޮޑަށް ކަރަންޓު ބޭނުން ކުރުން މަދު ކުރުމަށެވެ.
