އިނގިރޭސި ބޮޑު ވަޒީރު ލިޒް ޓްރަސްއަށް ބޮޑެތި ފާޑުކިޔުން އަމާޒުވެފައި ވަނިކޮށް، އެކަމަނާ ރައްޔިތުންގެ ކިބައިން މައާފަށް އެދިވަޑައިގެންފި އެވެ.
އެހެން ނަމަވެސް، މަގާމުން އިސްތިއުފާ ނުދެއްވާނެ ކަމަށް ޓްރަސް ވިދާޅުވި އެވެ. ޓްރަސް ވިދާޅުވީ ހެދުނު ގޯސްތަކާ ގުޅިގެން މައާފަށް އެދޭ ކަމަށެވެ.
ޓްރަސް އިގްތިސާސީ ސިޔާސަތަކީ އެންމެ ބޮޑު މަހުޖަނުންގެ ޓެކްސް ކުޑަ ކުރުމެވެ. އެކަމާ ހެދި އިގްތިސާދަށް ލޮޅުންތައް އެރި އެވެ.
އެންމެ ފަހުން ފިނޭންސް މިނިސްޓަރުކަމުގައި ކުރިން ހުންނެވި ކްވާސީ ކްވާޓެންގް މަގާމުން ވަކިކުރައްވައި، ޖެރެމީ ހަންޓް އެ މަގާމަށް ހަމަޖެއްސެވި އެވެ.
އާ ޗާންސެލަރު ކަމަށް ވަޑައިގެންނެވި ހަންޓް ނިންމެވީ ޓްރަސްގެ އިގްތިސާދީ ސިޔާސަތު އުވާލައި، މަހުޖަނުންގެ އަތުން ނަގާ ޓެކްސް ބޮޑު ކުރުމަށެވެ.
ބީބީސީއަށް ދެއްވި އިންޓަވިއުގައި ޓްރަސް ވިދާޅުވީ ބޮޑު ވަޒީރުކަމުގައި ހޭދަކުރެއްވި މަހެއްހާ ދުވަހުގެ ތެރޭގައި ގޯސްތަކެއް ހެދުނު ނަމަވެސް، އެކަންކަން ހައްލުކޮށްފައިވާ ކަމަށެވެ.
ސިޔާސަތަށް ބަދަލު ގެނައި ނަމަވެސް ޓްރަސް ވިދާޅުވީ އެކަމަނާގެ ދުރު ރާސްތާގެ ސްޓްރެޓެޖީއަކީ ޓެކްސް ކުޑަކޮށް، އިގްތިސާދީ ކުރިއެރުން ހޯދުން ކަމަށެވެ. އެކަމަކު މި ވަގުތު އިސްކަން ދެއްވާނީ އިގްތިސާދީ ހަމަޖެހުން ގެނައުމަށް ކަމަށް ފާހަގަކުރެއްވި އެވެ.
