ޔޫކްރެއިންގެ ވެރިރަށް ކިޔެވްއަށް މިސައިލް ހަމަލާތަކެއް ދިންތާ ހަފުތާއެއް ފަހުން، އަނެއްކާވެސް ރަޝިއާގެ ވަރުގަދަ ހަމަލާތަަކެއް އެ ސިޓީއަށް ދީފި އެވެ.
ބެލެވޭ ގޮތުގައި ހަމަލާތައް ދިނުމަށް ބޭނުން ކުރީ އިރާނުގައި އުފައްދާފައިވާ "ކަމިކަޒޭ" ޑްރޯންތަކެވެ. ކިޔެވްގެ އިތުރުން ޑްނީޕްރޯ އަދި ސުމީއަށް ވެސް ހަމަލާތައް އަމާޒު ކުރި އެވެ.
މިހާތަނަށް އަށް މީހުން މަރުވެފައިވާ އިރު، ބޮޑު ސަރަހައްދަކުން ކަރަންޓު ކެނޑިފައިވެ އެވެ. މިދިޔަ ހަފުތާގައި ކިޔެވް އާއި އެހެން ސިޓީތަކަށް ދިން ހަމަލާތަކުގައި 19 މީހުން މަރުވި އެވެ.
"ދުޝްމަނުންނަށް އަޅުގަނޑުމެންގެ ސިޓީތަކަށް ހަމަލާދެވިދާނެ. އެކަމަކު އޭގެ ސަބަބުން އަޅުގަނޑުމެން ފަހަތަކަށް ނުޖެހޭނަން،" ރައީސް ވޮލޮޑިމިރް ޒެލެންސްކީ ވިދާޅުވި އެވެ.
ޔޫރަޕިއަން ޔޫނިއަން (އީޔޫ) ގެ ބައެއް ފޮރިން މިނިސްޓަރު ވަނީ ރަޝިއާއަށް ޑްރޯން ސަޕްލައިކޮށްދޭތީ އިރާނާ ދެކޮޅަށް އިތުރު ދަތިކުރުމުގެ ފިޔަވަޅު އަޅަން ގޮވާލައްވާފަ އެވެ.
އެހެން ނަމަވެސް، އިރާނުން ތަކުރާރުކޮށް ބުނަމުން ދަނީ އެ ގައުމުން ޔޫކްރެއިން ހަނގުރާމައިގެ އެއްވެސް ފަޅިއަކަށް ހަތިޔާރު ފޯރުކޮށްނުދޭ ކަމަށެވެ.
މިދިޔަ ހަފުތާގައި ރަޝިއާގެ ރައީސް ލެޑިމިއަ ޕުޓިން ވިދާޅުވީ ވައިގެ ހަމަލާތައް ދޭން ފެށީ ރަޝިއާ އާއި ކްރައިމިއާ ގުޅޭ ބްރިޖަށް "ޓެރަރިސްޓް ހަމަލާއެއް ދިނުމުން" ކަމަށެވެ.
ރިޕޯޓުތައް ބުނާ ގޮތުން މިއީ މިދިޔަ ފެބްރުއަރީ މަހު ޔޫކްރެއިން ހަނގުރާމަ ފެށި ފަހުން ވެރިރަށް ކިޔެވްގެ މެދުތެރެއަށް ހަމަލާތައް ދިން ފުރަތަމަ ފަހަރެވެ.
