ރަޝިއާ ސިފައިންގެ ތަމްރީން މަރުކަޒެއްގައި ހޮނިހިރު ދުވަހު ބަޔަކު ބަޑި ޖަހައި 11 މީހުން މަރާލައިފި އެވެ.
ދައުލަތުގެ ރިއާ ނިއުސް އެޖެންސީން ބުނީ ހަތިޔާރު ބޭނުންކޮށްގެން ހެދި ތަމްރީނެއްގެ ތެރެއިން، ދެ ފިރިހެނުން ބަޑި ޖެހީ، ޔޫކްރެއިން ހަނގުރާމައިގައި ބައިވެރިވުމަށް އިސްނެގި ގްރޫޕަކަށް އަމާޒުކޮށް ކަމަށެވެ.
ރަޝިއާގެ ޑިފެންސް މިނިސްޓްރީން ބުނީ ބަޑި ޖެހި ދެ ފިރިހެނުން ނިސްބަތް ވަނީ ކުރީގެ ސޯވިއެޓް ޔޫނިއަންގެ ދަށުގައި ހިމެނޭ ގައުމަކަށް ކަމަށެވެ. އިތުރު ތަފްސީލް ހާމައެއް ނުކުރެ އެވެ.
ޔޫކްރެއިންގެ ބޯޑަރު ކައިރީގައި އޮންނަ ބެލްގޮރޯޑް ހިސާބުގައި ހިނގި އެ ހާދިސާގައި އެ ދެ ފިރިހެނުންގެ ގަޔަށް ބަޑި ޖަހައި މަރާލި އެވެ. އިތުރު 15 މީހުންނަށް އަނިޔާވި އެވެ.
މިދިޔަ މަހު ރައީސް ލެޑިމިއަ ޕުޓިން ނިންމެވީ ރަޝިއާގެ ރިޒާވް ފައުޖުން 300،000 މީހުން ޔޫކްރެއިން ހަނގުރާމައަށް ނެރުމަށެވެ.
އެކަން އިއުލާން ކުރުމާ އެކު ޝަރުތު ހަމަވާ ގިނަ ބަޔަކު ރަޝިއާ ދޫކޮށް ދާން މަސައްކަތް ކުރި އެވެ. އަދި ސައިބީރިއާގައި މީހުން އެންލިސްޓް ކުރަން އުޅުނު އޮފިސަރެއްގެ ގަޔަށް ބަޑި ޖަހައި މަރާލި އެވެ.
މިދިޔަ ހަފުތާގައި ޕުޓިން ވިދާޅުވީ ރިޒާވް ފައުޖުން 200،000 މީހުން މިހާރު ހަނގުރާމައިގައި ބައިވެރިވަމުންދާ ކަމަށާއި އިތުރަށް މީހުން ނެރުމުގެ ބޭނުމެއް މި ވަގުތަަށް ނެތް ކަމަށެވެ.
