ރަޝިއާގެ މިސައިލް ހަމަލާއެއްގައި އިންޖީނު ގެޔަކަށް ގެއްލުން ލިބުމުން ޔޫކްރެއިންގެ ވެރިރަށް ކިޔެވްގައި ދިރިއުޅޭ މީހުން ކަރަންޓު ބޭނުން ކުރުން މަދު ކުރަން އަންގައިފި އެވެ.
އޮފިޝަލުން ބުނީ ހަމަލާއަށް ފަހު ކަރަންޓުގެ ހިދުމަތް މެދުކެނޑުނު ނަމަވެސް، މިހާރު މުޅި ޔޫކްރެއިނަށް ހިދުމަތް ލިބޭނެ ކަމަށެވެ.
އެކަމަކު އެ ގަައުމުގެ ދައުލަތުގެ ހަކަަތައާ ބެހޭ ކުންފުނި ޔޫކްރެނޭޖޯއިން ބުނީ ކަރަންޓު ކަނޑަން ޖެހިދާނެ ކަމަށާއި ކޮންމެ ދުވަހަކު ވެސް ހަވީރު 05:00 އިން ރޭގަނޑު 11:00 އަށް ކަރަންޓު ބޭނުން ކުރުން މަދު ކުރަން ގޮވާލާ ކަމަށެވެ.
ޔޫކްރެއިންގެ ރައީސް އޮފީސް އިދާރާގެ އޮފިޝަލް ކިރީލޯ ޓިމޮޝެންކީ ވިދާޅުވީ ކިޔެވްގެ އިތުރުން ޒިޓޮމިރް، ޗެރްކަސީ އަަދި ޗެރްނިހިވްގެ ރައްޔިތުން ވެސް އެ އެންގުމަށް އަމަލު ކުރުން މުހިއްމު ކަމަށެވެ.
"އެ އެންގުމަށް އިޖާބަނުދޭ ނަމަ ގޮންޖެހުންތަކާ ދިމާވެ، އުއްބައްތީގެ އަލިކަމުގައި އުޅެން މަޖުބޫރު ވާނެ،" އޭނާ ވިދާޅުވި އެވެ.
ރަޝިއާ އާއި ކްރައިމިއާ ގުޅޭ ހަމައެކަނި ބްރިޖަށް ޔޫކްރެއިނުން ދިން "ޓެރަރިސްޓް ހަމަލާ" ގެ ބަދަލު ހިފުމުގެ ގޮތުން ރަޝިއާއިން ވައިގެ ކެމްޕެއިން ފެށީ މިދިޔަ ހޯމަ ދުވަހު އެވެ.
އެ ކެމްޕެއިންގައި ޔޫކްރެއިންގެ ވެރިރަށް ކިޔެވް އާއި އެހެން ސިޓީތަކަށް ވެސް އެއް ފަހަރާ ވައިގެ ހަމަލާ ދިނެވެ. ފެބްރުއަރީ މަހު ޔޫކްރެއިން ހަނގުރާމަައިގެ ކުރީކޮޅު ރަޝިއާ ސިފައިން ކިޔެވް ހިފަން ކުރި މަސައްކަތް ކާމިޔާބު ނުވުމުން، އެ ސިޓީއަށް ހަމަލާއެއް ނުދެ އެވެ. ހޯމަ ދުވަހުގެ ހަމަލާއަކީ ގިނަ މަސްތަކަކަށް ފަހު ވެރިރަށަށް ދިން ފުރަތަމަ ހަމަލާ އެވެ.
