މި މަހުގެ ހަތް ވަނަ ދުވަހު އއ. މާޅޮހު ދެކުނުން ބަންޑުން ޖަހާލި ލޯންޗުން ގެއްލިގެން ހޯދަމުންދާ މުހައްމަދު މިންހާޖު ގެއްލުމުގެ ހާދިސާގައި އޭނާއާއެކު ދަތުރުކުރި މީހާގެ ފަރާތުން ތަހުގީގަށް ސައްހަ މައުލޫމާތު ދީފައި ނުވާ ކަމަށް ފުލުހުން ބުނެފި އެވެ.
މި މަހުގެ ފަސް ވަނަ ދުވަހު މާލެއިން ފުރައިގެން އއ. އުކުޅަހަށް ދަތުރުކުރި ކަމަށް ބުނާ އެ ލޯންޗުން މިންހާޖާއެކު ދެން ދަތުރުކުރި އަލީ މުހައްމަދު ވަނީ މާޅޮހާ އިންވެގެން ހެން އޮންނަ ފެރިދޫ ފުއްޓަރު ފަރާތުން ފެނިފަ އެވެ. އޭނާ އިތުރު ފަރުވާ އަށް މާލެ ގެނެސް އައިޖީއެމްއެޗުގައި ވަނީ ފަރުވާދީފަ އެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވި ގޮތުގައި މި ދެ މީހުން އެކުގައި ކުރި ދަތުރާ ގުޅޭ ގޮތުން މިހާރު އަންނަނީ މައުލޫމާތު ސާފުކުރަމުންނެވެ.
"އަލީ އަހުމަދުގެ ފަރާތުން އަޅުގަނޑުމެންނަށް ލިބިފައިވާ މައުލޫމާތަކީ އެ މީހުން މަހަށް ނުކުމެ އުޅުނު ކަމަށް، ދެން އެހެންނަމަވެސް އަޅުގަނޑުމެންނަށް މި މައްސަލައާ ގުޅިގެން ހޯދި އެހެން މައުލޫމާތުތަކުގެ އަލީގައި އަދި ލޯންޗުން ފެނުނު އެއްޗެއްސަށް ބަލާއިރުގައި [އެއީ ސައްހަ މައުލޫމާތެއް ނޫން]،" ބަޝީރު ވިދާޅުވި އެވެ.
އެގޮތުން ލޯންޗު ފެނުނުއިރު ވަރަށް ގިނަ އަދަދެއްގެ ތެޔޮ ލޯންޗުގައި ހުރި ކަން ފާހަގަކުރައްވައި ބަޝީރު ވިދާޅުވީ ލޯންޗު ބަންޑުން ޖަހާލި ކަމަށް ބުނާ ހިސާބުގައި ވެސް ސުވާލު އުފެދޭ ކަންކަން ހުރި ކަމަށެވެ.
"ލޯންޗުން ބަންޑުން ޖަހާލާފައި އޮއްވައި ފެނުނު ހިސާބާއި އަދި އަހުމަދު [ލޯންޗު] ބަންޑުން ޖަހާލި ކަމަށް ބުނާ ހިސާބަށް ބަލާއިރުގައި އަޅުގަނޑުމެންނަށް ގަބޫލެއް ނުކުރެވޭ މަސްވެރިކަމަށް ނުކުމެ އުޅުނު ބައެއް ކަމަކަށް،" ބަޝީރު ވިދާޅުވި އެވެ.
އެ މީހުންގެ ދަތުރުގެ މަގުސަދާއި ދަތުރުގައި ހިނގާދިޔަ އެހެނިހެން ކަންކަން ތަހުގީގު ނިމުމުން އެނގޭނެ ކަމަށް ވެސް އޭނާ ވިދާޅުވި އެވެ.
ނޫސްވެރިންގެ ބައްދަލުވުމުގައި ސީރިއަސް އެންޑް އޮގަނައިޒް ކްރައިމް ޑިޕާޓްމަންޓްގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް ހަސަން ސައީދު ވިދާޅުވީ ލޯންޗުގައި ބޭނުންކޮށްފައިވާ ޖީޕީއެސްގެ ޒަރީއާއިން ދަތުރުކުރަމުން ދިޔަ ރާސްތާ ހޯދިފައިވާ ކަމަށެވެ.
މި ދަތުރާ ގުޅޭ ގޮތުން އުފެދޭ ގިނަ ސުވާލުތަކެއް ހުރި ކަމަށާއި ތަހުގީގުން އެ ސުވާލުތަކަށް ޖަވާބު ހޯދުމުގެ މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
މިންހާޖު ގެއްލިގެން ހޯދުމަށް ކުރަމުން ދިޔަ އޮޕަރޭޝަން މިހާރު ވަނީ ހުއްޓާލާފަ އެވެ. މި އޮޕަރޭޝަނުގައި ކަނޑުމަގުން އެމްއެންޑީއެފް ކޯސްޓްގާޑުގެ ދެ އުޅަނދެއް ބޭނުންކޮށްގެން ވަނީ ޖުމްލަ 665 އަކަ ނޯޓިކަލް މޭލުގެ ސަރަހައްދެއް ބަލާފަ އެވެ. އަދި ވައިގެ މަގުން އެމްއެންޑީއެފްގެ ޑޯނިއާ ފްލައިޓުން 2000 އަކަ ނޯޓިކަލް މޭލުގެ ސަރަހައްދެއް ބަލާފައިވާކަމަށް އެމްއެންޑީއެފް އިން ބުނެފައިވެ އެވެ.
