މި ވަގުތު ޔޫކްރެއިނަށް ވައިގެ ހަމަލާ ދިނުމުގެ ބޭނުމެއް ނެތް ކަމަށާއި އެ ގައުމު ސުންނާފަތިކޮށްލުމަކީ އަމާޒެއް ނޫން ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޕުޓިން ވިދާޅުވީ ފާއިތުވި ހަފުތާގައި ހިންގި ވައިގެ ކެމްޕެއިނުގައި ގިނަ ޓާގެޓުތަކަށް ހަމަލާދީ ނިމިފައިވާ ކަމަށެވެ. އިތުރު 300،000 ސިފައިން ކުރިއަށް އޮތް ދެ ހަފުތާ ތެރޭގައި ހަނގުރާމައަށް ނެރެވޭނެ ކަމަށް ވެސް އެމަނިކުފާނު ވިދާޅުވި އެވެ.
ސަރަހައްދީ ސަމިޓަކަށް ފަހު ކަޒަކިސްތާނުގެ ވެރިރަށް އާސްތާނާގައި ނޫސްވެރިންނާ ވާހަކަ ދައްކަވަމުން ޕުޓިން ވިދާޅުވީ މިދިޔަ ހަފުތާގެ ހަމަލާތަކުގައި 29 ޓާގެޓުގެ ތެރެއިން 22 ޓާގެޓު ސުންނާފަތިކޮށްލި ކަމަށެވެ.
ބާކީ އޮތް ހަތް ޓާގެޓް ނައްތާލުމުގެ މަސައްކަތް ވެސް ކުރަމުންދާ ކަމަށް ޕުޓިން ފާހަގަކުރެއްވި އެވެ.
"ބޮޑެތި ވައިގެ ހަމަލާތަކެއް އިތުރަށް ދިނުމުގެ ބޭނުމެއް ނެތް. އަޅުގަނޑުމެންގެ އެހެން ލަަނޑުދަނޑިތައް ވެސް އެބަހުރި."
ރަޝިއާ އާއި ކްރައިމިއާ ގުޅޭ ހަމައެކަނި ބްރިޖަށް ޔޫކްރެއިނުން ދިން "ޓެރަރިސްޓް ހަމަލާ" ގެ ބަދަލު ހިފުމުގެ ގޮތުން ރަޝިއާއިން ވައިގެ ކެމްޕެއިން ފެށީ މިދިޔަ ހޯމަ ދުވަހު އެވެ.
އެ ކެމްޕެއިންގައި ޔޫކްރެއިންގެ ވެރިރަށް ކިޔެވް އާއި އެހެން ސިޓީތަކަށް ވެސް އެއް ފަހަރާ ވައިގެ ހަމަލާ ދިނެވެ. ފެބްރުއަރީ މަހު ޔޫކްރެއިން ހަނގުރާމަައިގެ ކުރީކޮޅު ރަޝިއާ ސިފައިން ކިޔެވް ހިފަން ކުރި މަސައްކަތް ކާމިޔާބު ނުވުމުން، އެ ސިޓީއަށް ހަމަލާއެއް ނުދެ އެވެ. ހޯމަ ދުވަހުގެ ހަމަލާއަކީ ގިނަ މަސްތަކަކަށް ފަހު ވެރިރަށަށް ދިން ފުރަތަމަ ހަމަލާ އެވެ.
