ދުނިޔޭގެ އެންމެ ބޮޑު މަހުޖަނު އެލޮން މަސްކް ޔޫކްރެއިން ހަނގުރާމަ ނިންމޭނެ ގޮތްތަކާ ގުޅޭ ޕޯލް ޓްވިޓާގައި ހިއްސާ ކުރީ ރަޝިއާގެ ރައީސް ލެޑިމިއަ ޕުޓިންއާ މަޝްވަރާ ކުރުމަށް ފަަހު ކަމަށް ދެކެވޭ ވާހަކަ އޭނާ ދޮގުކޮށްފި އެވެ.
ޔޫރޭޝިއާ ގްރޫޕް ކުންފުނީގެ ވެރިޔާ އިއަން ބްރެމާ ބުނީ އެ ޕޯލް ހިއްސާ ކުރީ ޕުޓިންއާ ވާހަކަދެއްކުމަށް ފަހުގައި ކަމަށް، މަސްކް އޭނާ ކައިރީގައި ބުނި ކަމަށެވެ.
ބްރެމާގެ ނިއުސްލެޓާއެއްގަައި ލިޔުނު ގޮތުގަައި ކްރައިމިއާ ރަޝިއާގެ އަތްދަށުގައި ބޭއްވޭ ނަމަ މަޝްވަރާ ކުރަން ތައްޔާރު ކަމަށް ޕުޓިން، މަސްކަށް ދެންނެވި އެވެ.
އޭގެ އިތުރުން ކޮންމެ ގޮތަކުން ވެސް ޕުޓިންގެ ލަނޑުދަނޑިތައް ހާސިލްކުރައްވާނެ ކަމަށާއި ޔޫކްރެއިންގެ ސިފައިން ކްރައިމިއާއަށް އަރައިފި ނަމަ ނިޔުކްލިއާ ހަމަލާއެއްގެ ފުރުސަތު ބޮޑު ކަމަށް ވެސް މަސްކްއާ ހަވާލަދީ އޭނާ ލިޔުނެވެ.
އެކަމަކު މަސްކް އެ ވާހަކަތައް ދޮގުކުރެ އެވެ.
"އަހަރެން ޕުޓިންއާ ވާހަކަދެއްކީ އެންމެ ފަހަރަކު. އެއީ މީގެ 18 މަސް ކުރިން. އޭރު ވާހަކަ ދެއްކީ ޖައްވީ ކަންކަމާ ގުޅޭ ގޮތުން،" މަސްކް ކުރި ޓްވީޓެއްގައި ބުންޏެވެ.
މިދިޔަ ހަފުތާގައި މަސްކްގެ 107.7 މިލިއަން ފޮލޯވަރުން ކައިރީގައި އޭނާ އެދުނީ ހަނގުރާމަ ނިންމޭނެ ކަމަށް ފެންނަ ގޮތްތަކަކަށް ވޯޓު ދިނުމަށެވެ. އޭގެ ތެރޭގައި ޔޫކްރެއިނުގެ ބިމުން ބައެއް ރަޝިއާއަށް ދިނުން ހިމެނެ އެވެ.
ރަޝިއާއިން އެ ހިޔާލަށް ތާއީދު ކުރި އިރު، ޔޫކްރެއިނުން ހިތްހަމަނުޖެހުން ފާޅުކުރި އެވެ. ޔޫކްރެއިން ހަނގުރާމައިގެ އިތުރުން ޓައިވާން އޮންނަން ވާނީ ޗައިނާގެ ހާއްސަ އިދާރީ ޒޯނެއްގެ ގޮތުގައި ކަމަށް ވެސް މަަސްކް ދާދި ފަހުން ބުންޏެވެ.
