މިދިޔަ ހޮނިހިރު ދުވަހު ރަޝިއާ އާއި ކްރައިމިއާ ގުޅޭ ބްރިޖުގައި އުޅަނދެއް ގޮވި މައްސަލައާ ގުޅުން ހުރި އަށް މީހުން ރަޝިއާއިން ހައްޔަރުކޮށްފި އެވެ.
އެފްއެސްބީ ސެކިއުރިޓީ ސާވިސްއިން ބުނީ އޭގެ ތެރެއިން ފަސް މީހުންނަކީ ރަޝިއާ ރައްޔިތުން ކަމަށެވެ. ބާކީ ތިބީ ޔޫކްރެއިނާއި އަރްމީނިއާގެ މީހުންނެވެ.
ރަޝިއާއިން ތުހުމަތު ކުރާ ގޮތުގައި އެއީ ޔޫކްރެއިނުން ދިން ހަމަލާ އެކެވެ. އެހެން ނަމަވެސް އެއީ ހަމަޖެހޭ ތުހުމަތެއް ނޫން ކަމަށް ޔޫކްރެއިންގެ އޮފިޝަލަކު ވިދާޅުވި އެވެ.
އެ ހާދިސާއާ ގުޅިގެން ބަޔަކު ހައްޔަރު ކުރި އިރު، ބުދަ ދުވަހު ވެސް ޔޫކްރެއިންގެ ގިނަ ސިޓީތަކަކަށް ހަމަލާ ދިނެވެ. އެގޮތުން ހާސަން، ޒަޕޮރިއްޒިޒިއާ އަދި ނިކޮޕޯލް ހިމެނެ އެވެ.
ރަޝިއާގެ ރައީސް ލެޑިމިއަ ޕުޓިން ވިދާޅުވީ ކްރައިމިއާގެ ބްރިޖަށް ގެއްލުން ދިނީ ޔޫކްރެއިން ޖާސޫސީ ހިދުމަތްތަކުން ރާވައިގެން ހިންގި އަމަލެއްގައި ކަމަށެވެ.
ބްރިޖުގައި ހިނގި ގޮވުމުގެ ޒިންމާ ޔޫކްރެއިނުން އުފުލާފައެއް ނުވެ އެވެ. އެކަމަކު އެކަމުގެ ފަހަތުގައި ތިބީ ޔޫކްރެއިން ކަމަށް ދޭހަވާ މޭރުމަކުން އެ ގައުމުގެ އިސް އޮފިޝަލުން ކުރިން ވާހަކަ ދެއްކެވި އެވެ.
އެ ބްރިޖަކީ 2018 ވަނަ އަހަރު ޕުޓިން ހުޅުއްވައި ދެއްވި ބްރިޖެކެވެ. އެއީ ޔޫކްރެއިންގައި ތިބި ރަޝިއާ ސިފައިންނަށް މުހިއްމު އަސްކަރީ ސާމާނު ފޮނުވުމަށް ބޭނުންކުރާ ބްރިޖެކެވެ.
