ޕެރިސް، ފްރާންސް (އޮކްޓޯބަރު 11) - ޔޫކްރެއިންގެ އޮޑެއްސާ ސިޓީ ދުނިޔޭގެ ހެރިޓޭޖް ލިސްޓުގައި ހިމެނުމަށް އެދި ރައީސް ވޮލޮޑިމިރް ޒެލެންސްކީ އަންގާރަ ދުވަހު ރަސްމީކޮށް ޔުނެސްކޯއަށް ހުށަހަޅުއްވައިފި އެވެ.
"އަޅުގަނޑުމެންގެ ތާރީހާއި، ސަގަފާތާއި، ތަރިކަ ސުންނާފަތި ކުރާ މަންޒަރު ނުފެންނަ ކަމަށް ހަދައިގެން ދުނިޔެއިން ނޯންނާނެކަމުގެ ސާފު ސިގްނަލެއް ދޭން ޖެހޭ،" ޔުނެސްކޯގެ 58 މެމްބަރު ގައުމާ މުހާތަބުކޮށް ވީޑިއޯ މެދުވެރިކޮށް ޒެލެންސްކީ ވިދާޅުވި އެވެ.
"އެކަމަށް އެޅޭނެ އެއް ފިޔަވަަޅަކީ ތާރީހީ ގޮތުން މުހިއްމު އޮޑެއްސާ ހިމާޔަތް ކުރުން. އެއީ ރީތި ސިޓީއެއް. ބްލެކް ސީއިން ދަތުރު ކުރާ ބޯޓުތަކަށް މުހިއްމު ބަނދަރެއް،" އޭނާ ފާހަގަކުރެއްވި އެވެ.
އޮޑެއްސާ މަގްބޫލުވެފައި ވަނީ "ޕާލް އޮފް ދަ ބްލެކް ސީ" ގެ ގޮތުގަ އެވެ. އަށާރަ ވަނަ ގަރުނުގެ ފަހުކޮޅު ރަޝިއާގެ ތަހުތުގައި އިންނެވި އެމްޕްރެސް ކެތެރީން ދަ ގްރޭޓް ނިންމެވީ ރަޝިއާގެ އެންމެ ޒަމާނީ ބަނދަރު އެ ތަނުގައި ގާއިމް ކުރުމަށެވެ.
ތާރީހީ ސްޓެޗޫތަކާއި، ބިނާތަކާއި، އިމާރާތްތައް އޮޑެއްސާގައި ހުރެ އެވެ. މިދިޔަ ފެބްރުއަރީ މަހު ޔޫކްރެއިންގައި ހަނގުރާމަ ފެށުމުން، ސަރުކާރުން އެންމެ އިސްކަމެއްދީފައި ވަނީ އެ ތަންތަން ރައްކާތެރި ކުރުމަށެވެ. އެގޮތުން ވެލިބަސްތާ ޖަހައި ބިނާތައް ފޮރުވި އެވެ.
އެ ސިޓީ ހެރިޓޭޖް ލިސްޓުގައި ހިމަނަން ޔޫކްރެއިނުން އެދުމުން، ޔުނެސްކޯއިން ބުނީ ހުށަހެޅުން މުރާޖައާ ކުރާނީ ދުނިޔޭގެ ހެރިޓޭޖް ކޮމިޓީގެ ބައްދަލުވުމެއްގައި ކަމަށެވެ. ނަމަވެސް ބައްދަލުވުން އޮންނާނެ ތާރީހެއް ހާމައެއް ނުކުރެ އެވެ.
ޔޫކްރެއިންގެ ތާރީހީ ހަ ތަނެއް މިހާރު ވެސް ދުނިޔޭގެ ހެރިޓޭޖް ލިސްޓުގައި ހިމެނެ އެވެ. އެކަމަކު ނުރައްކަލަށް ހުށަހެޅިފައިވާ ސައިޓުތަކުގެ ލިސްޓުގައި އެއްވެސް ތަނެއް ނުހިމެނެ އެވެ. ޔުނެސްކޯއިން ބުނީ ހަނގުރާމއިގެ މިހާތަނަށް ހެރިޓޭޖް ލިސްޓުގައި ހިމެނޭ ތަނަކަށް ގެއްލުން ނުވާ ކަމަށެވެ.
