ހޯމަ ދުވަހު ރަޝިއާއިން ދިން މިސައިލް ހަމަލާތަކާ ގުޅިގެން ޔޫކްރެއިނުން ޔޫރަޕިއަން ޔޫނިއަން (އީޔޫ) އަށް ހަކަތަަ އެކްސްޕޯޓް ކުރުން ވަގުތީ ގޮތުން މެދުކަނޑާލަން ނިންމައިފި އެވެ.
ޔޫކްރެއިނުން ބުނީ ހަކަތަ އުފައްދާ ސްޓޭޝަންތަކަށް ގެއްލުންވެފައިވާ ކަމަށާއި އެހެންވެ އަންގާރަ ދުވަހުން ފެށިގެން އެކްސްޕޯޓް ކުރުން ވަގުތީ ގޮތުން މެދުކަނޑާލާނެ ކަމަށެވެ.
ވެރިރަށް ކިޔެވްގެ އިތުރުން ގިނަ ސިޓީތަކަކަށް ރަޝިއާއިން ހޯމަ ދުވަހު މިސައިލް ހަމަލާ ދިނީ، ރަޝިއާ އާއި ކްރައިމިއާއާ ދެމެދު އޮތް ހަމައެކަނި ބްރިޖުގައި އުޅަނދެއް ގޮވި ހާދިސާއަށް ފަހު އެވެ.
ޔޫކްރެއިނުން އެ ހާދިސާގެ ޒިންމާއެއް ނުނަގަ އެވެ. އެކަމަކު އެއީ ޔޫކްރެއިންގެ ހަމަލާއެއް ކަމަށް ދޭހަވާ މޭރުމަކުން އޮފިޝަލުން ވާހަކަދެއްކެވި އެވެ.
ރަޝިއާގެ ރައީސް ލެޑިމިއަ ޕުޓިން ވިދާޅުވީ އެއީ ޔޫކްރެއިނުން ދިން ޓެރަރިސްޓު ހަމަލާއެއް ކަމަށެވެ. ހޯމަ ދުވަހުގެ މިސައިލް ހަމަލާތައް ދިނީ އެގޮތަށް ވިދާޅުވި ފަހުންނެވެ.
މިދިޔަ ފެބްރުއަރީ މަހު ފެށި ޔޫކްރެއިން ހަނގުރާމައަށް ފަހު ރަޝިއާއިން ޔޫރަޕަށް ތެލާއި ގޭސް ފޯރުކޮށްދިނުން ހުއްޓާލާފައި ވާތީ ޔޫރަޕަށް ވަނީ ގޮންޖެހުންތަކާ ދިމާވެފަ އެވެ.
ޔޫކްރެއިންގެ ތާމަލް ޕްލާންޓުތަކުން ކަރަންޓު އުފައްދައި ޔޫރަޕަށް އެކްސްޕޯޓް ކުރުން އިތުރުކޮށް، މިދިޔަ ޖޫން މަހު ލަފާކުރީ މި އަހަަރު ނިމުމުގެ ކުރިން ޔޫކްރެއިނަށް 1.45 ބިލިއަން ޑޮލަރު ލިބޭނެ ކަމަށެވެ.
