ރަޝިއާ އާއި ކްރައިމިއާއާ ދެމެދު އޮންނަ ހަމައެކަނި ބްރިޖުގައި ގޮވި ގޮވުމަކީ "ޓެރަރިސްޓު ހަމަލާއެއް" ކަމަށް ރައީސް ލެޑިމިއަ ޕުޓިން ވިދާޅުވިތާ އިރުކޮޅެއް ފަހުން ޔޫކްރެއިންގެ ވެރިރަށް ކިޔެވް އާއި އެހެން ސިޓީތަކަށް މިސައިލް ހަމަލާތަކެއް ދީފި އެވެ.
ފެބްރުއަރީ މަހު ޔޫކްރެއިން ހަނގުރާމަައިގެ ކުރީކޮޅު ރަޝިއާ ސިފައިން ކިޔެވް ހިފަން ކުރި މަސައްކަތް ކާމިޔާބު ނުވުމުން، އެ ސިޓީއަށް ހަމަލާއެއް ނުދެ އެވެ. ހޯމަ ދުވަހުގެ ހަމަލާއަކީ ގިނަ މަސްތަކަކަށް ފަހު ވެރިރަށަށް ދިން ފުރަތަމަ ހަމަލާ އެވެ.
ކިޔެވް ސިޓީގެ ފުލުހުން ބުނީ ފަސް މީހުން މަރުވެ 12 މީހުންނަށް އަނިޔާވި ކަމަށެވެ. އޭގެ އިތުރުން ލްވިވް، ޑްނީޕްރޯ އަދި ކްރެމެޗުންކް ސިޓީއަށް ވެސް ހަމަލާތައް ދިނެވެ.
ރަޝިއާގެ ވަރުގަދަ ހަމަލާތަކެއް ޔޫކްރެއިނަށް ދީފައި މި ވަނީ ކްރައިމިއާގެ ބްރިޖަށް ލިބުނު ގެއްލުންތަކަށް ފަހު އެވެ. ޕުޓިން ވިދާޅުވީ ބްރިޖަށް ގެއްލުން ދިނީ ޔޫކްރެއިން ޖާސޫސީ ހިދުމަތްތަކުން ރާވައިގެން ހިންގި އަމަލެއްގައި ކަމަށެވެ.
ބްރިޖުގައި ހިނގި ގޮވުމުގެ ޒިންމާ ޔޫކްރެއިނުން އުފުލާފައެއް ނުވެ އެވެ. އެކަމަކު އެކަމުގެ ފަހަތުގައި ތިބީ ޔޫކްރެއިން ކަމަށް ދޭހަވާ މޭރުމަކުން އެ ގައުމުގެ އިސް އޮފިޝަލުން ވާހަކަ ދެއްކެވި އެވެ.
އެ ބްރިޖަކީ 2018 ވަނަ އަހަރު ޕުޓިން ހުޅުއްވައި ދެއްވި ބްރިޖެކެވެ. އެއީ ޔޫކްރެއިންގައި ތިބި ރަޝިއާ ސިފައިންނަށް މުހިއްމު އަސްކަރީ ސާމާނު ފޮނުވުމަށް ބޭނުންކުރާ ބްރިޖެކެވެ.
