ލިވަޕޫލް (އޮކްޓޫބަރު 9) - އިނގިރޭސި ޕްރިމިއާ ލީގުގައި މިރޭ ކްރިސްޓިއާނޯ ރޮނާލްޑޯ ކްލަބް ކެރިއަރުގައި ޖެހި 700 ވަނަ ގޯލާ އެކު، މެންޗެސްޓާ ޔުނައިޓެޑުން ފަހަތުން އަރައި 2-1 އިން އެވަޓަން ބަލިކޮށްފި އެވެ.
ރޮނާލްޑޯ، 37، މިރޭގެ މެޗުގައި ކުޅެން އެރީ ފުރަތަމަ ހާފުގައި ބަދަލު ކުޅުންތެރިއެއްގެ ގޮތުގަ އެވެ. އެއީ ފުރަތަމަ ހާފުގައި ޔުނައިޓެޑްގެ ފޯވާޑް، އެންތަނީ މާޝިއަލް އަށް އަނިޔާވުމުންނެވެ. ރޮނާލްޑޯ، މިރޭ ކްލަބް ކެރިއަރުގައި 700 ގޯލު ހަމަކުރިއިރު، އެ ގޯލުތަކުގެ ތެރެއިން 144 ގޯލު ޖެހީ ޔުނައިޓެޑް އަށެވެ. ޔުނައިޓެޑަށް ޖެހި 26 ގޯލެއް ޖެހީ ދެ ވަނަ ފަހަރަށް އެ ޓީމާ ގުޅުމަށް ފަހު އެވެ.
އެހެން ކްލަބްތަކަށް ރޮނާލްޑޯ ޖަހައިދިން ގޯލުތަކަށް ބަލާއިރު، ސްޕޯޓިން އަށް ފަސް ގޯލު، ރެއާލް މެޑްރިޑަށް 450 ގޯލު އަދި ޔުވެންޓަސް އަށް ވަނީ 101 ގޯލު ކާމިޔާބުކޮށްދީފަ އެވެ.
އެވަޓަންގެ ގުޑިސަން ޕާކުގައި މިރޭ ކުޅުނު މެޗުގައި އެ ޓީމަށް ލީޑުނަގައިިދިނީ ފަސް ވަނަ މިނިޓްގައި އަލެކްސް އިވޯބީ އެވެ. މިއީ ޔުނައިޓެޑްގެ ކަސެމީރޯ އަތުން ގެއްލުނު ބޯޅައެއްގައި އެވަޓަން ކުރި އެޓޭކަކުން އިވޯބީ އޭރިއާބޭރުން ޖެހި ޝޮޓަކުން ޖެހި ގޯލެކެވެ.
ޔުނައިޓެޑަށް އެއްވަރުކޮށްދިން ގޯލު ޖެހީ 15 ވަނަ މިނިޓްގައި އެންޓޮނީ އެވެ. މިއީ އެވަޓަންގެ މެދުތެރެއިން ގެއްލުނު ބޯޅައެއް ހޯދައި، ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އެ ޓީމުގެ މާޝިއަލް އަށް ދިނުމުން އޭނާ ތަނަވަސްކޮށްދިން ފުރުސަތަކުން އެންޓޮނީ ޖެހި ގޯލެކެވެ.
ބޮޑު އަގުގައި އަޔަކްސް ދޫކޮށް ޔުނައިޓެޑާ ގުޅުނު އެންޓޮނީ އަކީ ޔުނައިޓެޑަށް ބަދަލުވި ފަހުން ލީގުގެ ފުރަތަމަ ތިން މެޗުގައި ލަނޑު ޖެހި ފުރަތަމަ ކުޅުންތެރިޔާ އެވެ.
މެޗުގައި ފުރަތަމަ ފަހަރަށް ޔުނައިޓެޑުން ލީޑުނެގި ގޯލު ފެނާންޑޭސް ޖެހި ނަމަވެސް ރޮނާލްޑޯ އޮފްސައިޑް ކަމަށް ނިންމައި، އެ ގޯލު ބަލައިނުގަތެވެ. އެހެން ނަމަވެސް މެޗުގެ 44 ވަނަ މިނިޓްގައި ރޮނާލްޑޯ ވަނީ ޔުނައިޓެޑަށް ލީޑުނަގައިދީފަ އެވެ. ކަސެމީރޯ ދިން ބޯޅައެއް ހިފައިގެން އޭރިއާތެރެއަށް ވަދެ، ރޮނާލްޑޯ ވަނީ ގޯލުގެ ކައިރީ ކަނަށް ފޮނުވާލައިފަ އެވެ.
ދެ ވަނަ ހާފުގައި ޔުނައިޓެޑްގެ މާކަސް ރެޝްފޯޑް ޖެހި ގޯލެއް ބަލައިނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީގަ އެވެ. އެއީ ރެޝްފޯޑް އެ ބޯޅަ ގޯލަށް ޖެހުމުގެ ކުރިން އަތުގައި ބޯޅަ ޖެހިފައިވާ ކަމަށް ބަލައިފަ އެވެ.
އެވަޓަން އިން ނަތީޖާ ހަމަހަމަކުރެވޭތޯ ކުރި މަސައްކަތްތަކުގެ ހުރަހަކަށްވީ ޔުނައިޓެޑްގެ ކީޕަރު ޑޭވިޑް ޑެހެއާ އެވެ. ޑެހެއާ ވަނީ އެވަޓަން އިން ފޮނުވާލި ގިނަ ބޯޅަތަކެއް ހުއްޓުވައިފަ އެވެ.
މިދިޔަ ހަފްތާގައި މެންޗެސްޓާ ސިޓީ އަތުން ވީ ބަލި ހަނދާން ނައްތާލަން މިއީ ޔުނައިޓެޑަށް މުހިންމު ނަތީޖާ އެކެވެ.
ނެދަލެންޑްސްގެ ކޯޗު އެރިކް ޓެން ހާގްގެ ކޯޗުކަމުގައި ކުޅޭ ޔުނައިޓެޑުން މި ވަނީ އެންމެ ފަހުން ލީގުގައި ކުޅުނު ހަ މެޗުގެ ތެރެއިން ފަސް މެޗުން މޮޅުވެ، އަށް މެޗުން 15 ޕޮއިންޓް ހޯދައި ލީގުގެ ފަސް ވަނަ އަށް ޖެހިލައިފަ އެވެ.
ހަތް މެޗަށް ފަހު ބަލިވި އެވަޓަން އޮތީ ލީގުގެ 12 ވަނައިގަ އެވެ. އެއީ ނުވަ މެޗުން 10 ޕޮއިންޓާ އެކު އެވެ.
