ކްރައިމިއާގެ ބްރިޖުގައި އުޅަނދެއް ގޮވައި ތިން މީހުން މަރުވެއްޖެ

ހޮނިހިރު ދުވަހު ކްރައިމިއާގެ ބްރިޖެއްގައި ޓްރަކެއް ގޮވައި ތިން މީހުން މަރުވެފައިވާ ކަމަށް ރަޝިއާއިން ބުނެފި އެވެ.

އެކަމުގެ ފަހަތުގައި ވަނީ ޔޫކްރެއިން ކަމަށް ރަޝިއާއިން މިހާތަނަކަށް ނުބުނެ އެވެ. ހޮނިހިރު ދުވަހު ރަޝިއާއިން ވަނީ ޔޫކްރެއިން ހަނގުރާމައަށް އާ ކޮމާންޑަރަކު ވެސް ހަމަޖައްސައިފަ އެވެ.

ގާތްގަނޑަކަށް 19 ކިލޯމީޓަރު ދިގު ބްރިޖުގައި ގޮވުމެއް ގޮވި ނަމަވެސް، މިހާރު ވަނީ އާއްމު ޓްރެފިކަށް އަލުން ބްރިޖު ހުޅުވާލައިފަ އެވެ.

އެއީ ޔޫރަޕުގެ އެންމެ ދިގު ބްރިޖެވެ. ސޯޝަލް މީޑިއާގައި އާއްމުވި މަންޒަަރުތަކުން ފެންނަނީ ބްރިޖުގެ ބައެއްގައި ރޯވެފައި އޮތް އިރު، ބައެއް ބައިތައް ވެއްޓޭ ތަނެވެ.

ރަޝިއާއިން ބުނީ ތިން މީހުން މަރުވި ކަމަށެވެ. މަރުވީ ކޮން ބަޔެއްކަން ދެނެގަތުމުގެ މަސައްކަތް ދަނީ ކުރަމުންނެވެ.

ބްރިޖު މަތީގައި ގޮވި ޓްރަކުގެ ވެރިޔާއަކީ ރަޝިއާގެ ދެކުނު ކްރަސްނޮޑާރް ސަރަހައްދުގައި ދިރިއުޅޭ މީހެކެވެ. އޭނާ ދިރިއުޅޭ ގެ ބަލައި ފާސްކުރުމުގެ މަސައްކަތް ވެސް ދަނީ ކުރަމުންނެވެ.

އެ ހާދިސާގެ ސަބަބުން ހަތް ތެޔޮ ޓޭންކަރުގައި ރޯވެ، ބްރިޖުގައި ކާރު ދަތުރު ކުރަން ހާއްސަ ލޭނާއި ރޭލު ދަގަނޑުގެ ބަޔެއް ވަަނީ ވެއްޓިފަ އެވެ.

އެ ބްރިޖަކީ 2018 ވަނަ އަހަރު ރަޝިއާގެ ރައީސް ލެޑިމިއަ ޕުޓިން ހުޅުއްވައި ދެއްވި ބްރިޖެކެވެ. އެއީ ޔޫކްރެއިންގައި ތިބި ރަޝިއާ ސިފައިންނަށް މުހިއްމު އަސްކަރީ ސާމާނު ފޮނުވުމަށް ބޭނުންކުރާ ބްރިޖެކެވެ.

ޓްރަކް ގޮވުމާއި ޔޫކްރެއިނާ ގުޅުމެއްވާ ކަމަށް މިހާތަނަށް ޔޫކްރެއިން ސަރުކާރުން ހާމައެއް ނުކުރެ އެވެ. އެކަމަަކު ޔޫކްރެއިން ރައީސްގެ އެޑްވައިޒަރު ވިދާޅުވީ "ކްރައިމިއާގެ ބްރިޖަކީ ފެށުން" ކަމަށެވެ.