ގެމްބިއާގައި 66 ކުދިން މަރުވުމާ ގުޅުން އޮތް ކަމަށް ބެލެވެނީ އިންޑިއާގައި އުފެއްދި ކެއްސާތީ ބޯ ބޭސް ނުވަތަ ކޯފް ސިރަޕްގެ ހަތަރު ބާވަތެއް ކަމަށް ދުނިޔޭގެ ސިއްހަތު ޖަމިއްޔާ (ޑަަބްލިއުއެޗްއޯ) އިން ބުނެފި އެވެ.
ހުޅަނގު އެފްރިކާގެ ގައުމެއް ކަމަށްވާ ގެމްބިއާގައި ކުދިންތަކަކަށް ކިޑްނީގެ މައްސަލަތަކެއް ދިމާވެ މަރުވުމުން ޑަބްލިއުއެޗްއޯއިން ތަހުލީލުތަކެއް ކުރި އެވެ.
ޑަބްލިއުއެޗްއޯއިން މިހާރު ދަނީ އެ ބޭސްތަައް އުފެއްދި މެއިޑެން ފާމަސޫޓިކަލް ކުންފުންޏާއި އިންޑިއާގެ އިދާރާތަކާ ގުޅިގެން އިތުރު ތަހުލީލުތައް ހިންގަމުންނެވެ.
އެ ހަތަރު ބާވަތުގެ ކޯފް ސިރަޕް ވިއްކުން ހުއްޓާލަން ޑަބްލިއުއެޗްއޯއިން ވަނީ އަންގައިފަ އެވެ. އެ މަައްސަލައިގައި އިންޑިއާއިން އަދި ވަކި އެއްޗެއް ނުބުނެ އެވެ.
ޑަބްލިއުއެޗްއޯއިން ފާހަަގަކުރި ހަތަރު ބޭހަކީ ޕްރޯމެތަޒައިން އޯރަލް ސޮލިއުޝަން، ކޯފެކްސްމެލިން ބޭބީ ކޯފް ސިރަޕް، މޭކޯފް ބޭބީ ކޯފް ސިރަޕް އަދި މެގްރިޕް އެން ކޯލްޑް ސިރަޕް އެވެ.
އެ ޖަމިއްޔާއިން ބުނީ ލެބޯޓަރީ ތަހުލީލުން ދެއްކި ގޮތުގައި އެ ބޭސްތަކުގައި ޑަޔެތިލީންސް ގްލައިކޯލް އަދި އެތެލީން ގްލައިކޯލް ހިމެނެނީ ނުރައްކާތެރި މިންވަރަށް ކަމަށެވެ.
މިހާތަނަށް އެ އުފެއްދުންތައް ފާހަގަކުރެވުނީ ހަމައެކަނި ގެމްބިއާއިން ނަމަވެސް، އެހެން ގައުމުތަކަށް ވެސް ފޯރާފައިވުން އެކަށީގެންވާ ކަމަށް ޑަބްލިއުއެޗްއޯއިން ބުންޏެވެ.
