މަސްތުވާތަކެތީގެ މައްސަލައެއްގައި، އުމުރުން 63 އަހަރުގެ މީހަކު އުމުރަށް ޖަލަށްލާން ކްރިމިނަލް ކޯޓުން ކުރި ހުކުމެއް ހައި ކޯޓުން ދަމަަހައްޓައިފި އެވެ.
އެ މައްސަލައިގައި އޭނާ ހައްޔަރު ކުރީ މީގެ ހަ އަހަރު ކުރިން، ޖޫން 14، 2016 ގައި އެވެ. އޭނާގެ އަތުން މަސްތުތާވަކެތި ފެނުނީ މާލޭގެ އަމީނީ މަގުގައި ހުންނަ ދިރާގު ހެޑް އޮފީސް ކައިރިން ހުއްޓުވައި ބަލައި ފާސް ކުރަން އުޅުމުގެ ތެރޭގައި ސިނގިރޭޓް ފޮއްޓެއްގެ ވައްޓާލުމުން އެ ނަގައި ބެލިއިރު ފޮށި ތެރެއިން ހަ ގްރާމް ކުރި މަސްތުވާތަކެތި ފެނުމުނެވެ.
ކްރިމިނަލް ކޯޓުގައި މި މައްސަލައިގެ ހުކުމް އިއްވީ މާޗު 17، 2019 ގަ އެވެ. އޭރު އޭނާގެ އުމުރަކީ ގާތްގަނޑަކަށް 60 އަހަރެވެ. އެ ކޯޓުން ހުކުމްކުރީ އުމުރު ދުވަހަށް އޭނާ ޖަލަށް ލުމާއެކު އެއް މަސް ދުވަހުގެ ތެރޭގައި މީރާއަށް އެއް ލައްކަ ރުފިޔާގެ ޖޫރިމަނާއެއް ދެއްކުމަށެވެ.
އެ މައްސަލަ ހައި ކޯޓުގައި އިސްތިއުނާފްކުރީ، ދައުލަތުން ކުރާ ދައުވާގައި ބުނާ ވަރުގެ ސިނގިރޭޓު ފޮއްޓެއްގައި އެ ބުނާ ވަރުގެ މަސްތުވާތަކެތި ލެވިދާނެ ކަމާ މެދު ސުވާލު އުފައްދައިގެނެވެ. އެކަން ރަނގަޅަށް ހެކިންނަށް އޮޅުންފިލާފައިނުވާ ކަމަށް ވެސް ދައުވާ ލިބޭ ފަރާތުން ބުންޏެވެ.
ނަމަވެސް ދައުލަތުން ބުނީ ސިނގިރޭޓު ފޮއްޓަށް އެ ބަރުދަނުގެ މަސްތުވާތަކެތި ލެވިދާނެތޯ މީގެ ކުރިން ދައުވާ ލިބޭ ފަރާތުން ސުވާލު އުފައްދާފައިނުވާ ކަމަށެވެ. އެހެންކަމުން އާ ނުކުތާއެއް ނަގައިގެން ހައި ކޯޓުގައި އެކަމަށް ބަހުސް ނުކުރެވޭނެ ކަމަށް ދައުލަތުން އެ މައްސަލައިގައި ބުންޏެވެ.
ހައި ކޯޓުން މިއަދު ކޮށްފައިވާ ހުކުމުގައިވާ ގޮތުން މައްސަލަ ބެއްލެވި ފަނޑިޔާރުން ވެސް ބުރަވީ ދައުލަތުގެ ނުކުތާއަށެވެ. އަދި ދަށު ކޯޓުން ކޮށްފައިވާ ހުކުމަށް ބަދަލެއް ގެންނަން ޖެހޭ ވަރުގެ ގާނޫނީ އަދި ޝަރުއީ ސަބަބެއް ނެތް ކަމަށް ފަނޑިޔާރުން ކަނޑައެޅުއްވި އެވެ.
އެ މައްސަލަ ހައި ކޯޓުގައި ބެއްލެވީ ތިން ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު މުހައްމަދު ފައިސަލެވެ. ދެން ތިއްބެވީ ފަނޑިޔާރު މުހައްމަދު ނިޔާޒް އާއި ފަނޑިޔާރު ހުސައިން މަޒީދެވެ.
