އެންމެ ގިނައިން ތެޔޮ އުފައްދާ ގައުމުތަަކުން އެކްސްޕޯޓް މަދު ކުރަން ނިންމުމާ އެކު ދުނިޔޭގެ ބާޒާރުގައި ތެލުގެ އަގުތައް އުފުލޭނެ ކަމަށް ބެލެވިއްޖެ އެވެ.
އޯޕެކް ޕްލަސް ގްރޫޕުން ބުނީ ކޮންމެ ދުވަހަކު އުފައްދާ ތެލުން ދެ މިލިއަން ފީފާ މަދު ކުރަން ނިންމާފައިވާ ކަމަށެވެ. އެ ގްރޫޕްގައި ރަޝިއާ އާއި ސައުދީ އަރަބިއްޔާ ހިމެނެ އެވެ.
އޯޕެކް ޕްލަސް ގްރޫޕުން ބުނީ ދުނިޔޭގެ އިގްތިސާދު މަޑުޖެހެމުން ދާތީ ތެލުގެ އަގުތައް ވެއްޓެން ފަށާފައިވާ ކަމަށާއި އެކްސްޕޯޓް މަދު ކުރަން ނިންމީ އަގުތައް އެއްވަރެއްގައި ހިފެހެއްޓުމަށް ކަމަށެވެ.
އެފަދަ ނިންމުމެއް ނިންމާނެ ކަމަށް ބެލެވިފައި ވާތީ މި ހަފްތާގެ ތެރޭގައި ތެލުގެ އަގު އުފުލުނެވެ. އެގޮތުން ބުދަ ދުވަަހު އެއް ޕަސެންޓުން އަަގު އުފުލި ތެޔޮ ފީފާއެއް އުޅުނީ 92.74 ޑޮލަރަށެވެ.
މިއީ 2020 ވަނަ އަހަރަށް ފަހު އޯޕެކް ޕްލަސް ގްރޫޕުން އެކްސްޕޯޓް އެންމެ ބޮޑަށް ދަށް ކުރި ފަހަރެވެ. އެގޮތަށް ނިންމީ އެކްސްޕޯޓް އިތުރު ކުރަން އެމެރިކާއިން ބާރު އަޅަމުން ދަނިކޮށެވެ.
ވައިޓް ހައުސްއިން ނެރުނު ބަޔާނެއްގައި ބުނީ "ދުރު ވިސްނުމެއް ނެތް އެ ނިންމުމާ މެދު އެމެރިކާގެ ރައީސް ޖޯ ބައިޑެން ހިތާމަ ކުރައްވާ" ކަމަށެވެ.
