ޔޫކްރެއިން ހަނގުރާމަ ނިމުމަކަށް ގެނެވޭނެ ގޮތްތަކެއް ހުށަހަޅައި ބިލިއަނަރު އެލޮން މަސްކް ޓްވިޓާގައި ޕޯލް ހުޅުވާލުމުން، ޔޫކްރެއިންގެ ރައީސް ވޮލޮޑިމިރް ޒެލެންސްކީ ވެސް ރަައްދުގައި ޕޯލްއަކަށް ހުޅުވާލައިފި އެވެ.
މަސްކްގެ 107.7 މިލިއަން ފޮލޯވަރުން ކައިރީގައި އޭނާ އެދުނީ ހަނގުރާމަ ނިންމޭނެ ކަމަށް ފެންނަ ގޮތްތަކަކަށް ވޯޓު ދިނުމަށެވެ. އޭގެ ތެރޭގައި ޔޫކްރެއިނުގެ ބިމުން ބައެއް ރަޝިއާއަށް ދިނުން ހިމެނެ އެވެ.
އެހެންވެ، ޒެލެންސްކީ ރައްދުގައި ހުޅުވާލި ޕޯލްގައި އެދިވަޑައިގެންނެވީ ދުނިޔޭގެ އެންމެ ބޮޑު މަހުޖަނާ މެދު އާއްމުން ގަޔާ ވަނީ ރަޝިއާއަށް ތާއީދު ކުރުމުންތޯ ނުވަތަ ޔޫކްރެއިނަށް ތާއީދު ކުރުމުންތޯ ސާފުކޮށްދިނުމަށެވެ.
ޔޫކްރެއިންގެ ބިމުން ބަޔެއް ރަޝިއާއަށް ދީގެން ހަނގުރާމަ ނިންމަން އާއްމުން ދެކޭ ގޮތެއް ބަލަން މަސްކް ޕޯލް ހުޅުވި އިރު، ދާދި ފަހުން ރަޝިއާއިން ވަނީ ޔޫކްރެއިންގެ ހަތަރު ތަނެއް އެ ގައުމުގެ ދަށަށް ގެންގޮސްފަ އެވެ.
މަަސްކް އިތުރަަށް ހުށަަހެޅީ 2014 ވަނަ އަހަރު ރަޝިއާއިން ހިފި ޔޫކްރެއިންގެ ކްރައިމިއާއަކީ ރަސްމީކޮށް ރަޝިއާގެ ތަނެއްގެ ގޮތުގައި ދުނިޔެއިން ބަލައިގަތުމަށެވެ.
އޭގެ އިތުރުން މި ހަނގުރާމައިގައި ނިޔުކްލިއާ ހަތިޔާރު ބޭނުން ކުރުމުގެ ފުރުސަތު އެބަ އޮތް ކަމުގެ އިންޒާރު ވެސް މަސްކް ދިނެވެ.
މަސްކް ޕޯލް ހުޅުވާލިތާ 10 ގަޑިއިރު ފަހުން ދެ މިލިއަން މީހުން ވޯޓުލާފައިވެ އެވެ. ޒެލެންސްކީ ޓްވީޓް ކުރެއްވިތާ އަށް ގަޑިއިރު ފަހުން 1.5 މިލިއަން މީހުން ވޯޓު ދިނެވެ.
ހަނގުރާމައިގެ ކުރީކޮޅު ޔޫކްރެއިނަށް އެހީވުމަށް މަސްކްގެ ސެޓެލައިޓް އިންޓަނެޓް ކުންފުނިން ބައެއް ސާމާނު ހަދިޔާކުރި އެވެ. އެހެންވެ، ހަނގުރާމަ ނިމުމުން، މަސްކް ޔޫކްރެއިނަށް ވަޑައިގެންނެވުމަށް ޒެލެންސްކީ ދައުވަތު އެރުވި އެވެ.
