އިންޑިއާގެ ރިއެލިޓީ ޓީވީ ޝޯ ބިގް ބޮސް 16 މިދިޔަ ހޮނިހިރު ދުވަހު ކަލާޒް ޓީވީއިން ދައްކަން ފެށި އިރު، މި ސީޒަންގައި ފިލްމު ޑިރެކްޓަރު ސާޖިދު ހާން ހިމަނާފައި ވާތީ ފާޑުކިޔުން އަމާޒުވެއްޖެ އެވެ.
އެ ޝޯ ހޯސްޓު ކުރަނީ ބޮލީވުޑްގެ ސުޕަސްޓާ ސަލްމާން ހާން އެވެ. މި ފަހަރު ޝޯގެ ހައުސްމޭޓުންގެ ތެރޭގަައި ފިލްމު ޑިރެކްޓަރު ސާޖިދު ހާން ހިމެނެ އެވެ.
ސާޖިދް ހާންއާ ދެކޮޅަށް ޖިންސީ ފުރައްސާރައިގެ ތުހުމަތު ކުރީ މީގެ ހަތަރު އަހަރު ކުރިން އަންހެން ނޫސްވެރިޔަކާއި އެކުގަައި މަސައްކަތް ކުރި އިތުރު އަށް އަންހެނުންނެވެ.
އޭނާ ތުހުމަތުތައް ދޮގު ކުރާއިރު، ފުލުހުން ވެސް އެއްވެސް މައްސަލައެއް ތަހުގީގެއް ނުކުރެ އެވެ. އެހެން ނަމަވެސް މި ފަހަރު ބިގް ބޮސްގެ ހައުސްމޭޓުންގެ ތެރޭގައި އޭނާ ހިމެނޭތީ މީހުން ދަނީ ފާޑުކިޔަމުންނެވެ.
ލަވަކިޔުންތެރިޔާ ސޯނާ މޮހާޕަތްރާ ބުނީ އިންޑިއާގެ ޓީވީ ޗެނަލްތަކާ މެދު ލަދު ގަންނަ ކަމަށާއި ޖިންސީ ފުރައްސާރައިގެ ތުހުމަތު ކުރެވޭ ފިރިހެނުން ޗެނަލްތަކުގައި ބައިވެރިކޮށްގެން ނުވާނެ ކަމަށެވެ.
ނޫސްވެރިޔާ ބަރްކާ ދަތު ބުނީ ސާޖިދު ހާން ޝޯގައި ހިމެނުމުން ދައްކުވައިދެނީ އަންހެނުންގެ އިހުސާސްތަކަށް އެއްވެސް ގޮތަކަށް ނުބަލާކަން ކަމަށެވެ.
ހޮނިހިރު ދުވަހުން ފެށިގެން ކަލާޒް ޓީވީއިން ޝޯ ޕްރޮމޯޓް ކުރަމުންދާ އިރު، ފާޑުކިޔުންތަކާ ގުޅިގެން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
ބިގް ބޮސްއަކީ އިންޑިއާގެ އެންމެ މަގްބޫލް ރިއެލިޓީ ޝޯ އެވެ. އެ ޝޯގެ ވިއުވިން ޓައިމްގެ ގޮތުގައި އެތައް ބިލިއަން ގަޑިއިރެއް ރިކޯޑު ކުރެވޭ އިރު، ޑިޖިޓަލް ސްޓްރީމިން ސާވިސް ވޫޓްއިން 2020 ވަނަ އަހަރުން ފެށިގެން ޝޯ ދައްކަން ފެށުމުން އިތުރަށް މަގްބޫލުކަން ލިބުނެވެ.
ޝޯއިން ސާޖިދު ހާން ވަކިކުރުމަށް ގޮވާލައި ޕެޓިޝަނެއް ވެސް ވަނީ ފަށާފަ އެވެ. މިހާތަނަަށް 5،000 އަށް ވުރެ ގިނަ މީހުން ސޮއިކޮށްފައިވެ އެވެ.
އޭނާއާ ދެކޮޅު ތުހުމަތުތއް ފެންމަތިވީ 2018 ވަނަ އަހަރު "މީޓޫ" ހަރަކާތުގެ ތެރެއިންނެވެ. އެއީ ޖިންސީ އަނިޔާ އާއި ޖިންސީ ފުރައްސާރަ ކުރާ މީހުން ބޭޒާރު ކުރުމަށް ހިންގި ހަރަކާތެކެވެ.
ބޮލީވުޑްގެ އެންމެ ބޮޑެތި ތަރިން ހިމެނޭ ކާމިޔާބު ފިލްމުތައް އުފެއްދި ސާޖިދް ހާންއާ ދެކޮޅަށް ގިނަ އަންހެނުންތަކެއް ތުހުމަތު ކުރި އެވެ.
އެކަމަކު އޭނާ ތުހުމަތުތައް ދޮގުކުރި އެވެ. އިންޑިއަން ފިލްމު އެންޑް ޓެލެވިޝަން ޑިރެކްޓާޒް އެސޯސިއޭޝަނުން އޭނާ އެއް އަހަރަށް ސަސްޕެންޑް ކުރި އެވެ.
