ޗެކް ރިޕަބްލިކްގަައި ކްރައުޑްފަންޑް ކޮށްގެން 1.30 މިލިއަން ޑޮލަރު އެއްކޮށް ޔޫކްރެއިން ފައުޖަށް ޓޭންކަރެއް ގަނެދީފި އެވެ.
"ޕުޓިންއަށް ހަދިޔާއެއް" ގެ ނަމުގައި ހިންގި ކެމްޕެއިނަށް 11،288 މީހުން ފައިސާ ދިނެވެ. މިއީ ކްރައުޑްފަންޑް ކޮށްގެން ހަނގުރާމައަށް އެއްޗެއް ހޯދި ފުރަތަމަ ފަހަަރެވެ.
އެ ފައިސާއަށް ގަތީ ޓީ-72 ޓޭންކެކެވެ. ޓޯމަސްގެ ނަން ދީފައިވާ އެ ޓޭންކު ވަރަށް އަވަހަށް ޔޫކްރެއިނަށް ފޮނުވާނެ އެވެ.
ކްރައުޑްފަންޑް ކުރާ ކެމްޕެއިނަށް ޗެކް ރިޕަބްލިކްގެ ޑިފެންސް މިނިސްޓްރީ އާއި ޕްރާގްގައި ހުންނަ ޔޫކްރެއިން އެމްބަސީގެ އެއްބާރުލުން ލިބުނެވެ.
ޓްވިޓާގައި ޕޯސްޓުކުރި މެސެޖެއްގައި ޗެކް ޑިފެންސް މިނިސްޓަަރު ޔާނާ ޗެންރޮޗޯވާ ވިދާޅުވީ މިއީ ޕުޓިންއަށް ރަނގަޅު ހަދިޔާއަކަށް ވާނެ ކަމަށެވެ. ޕުޓިންގެ 70 ވަނަ އުފަން ދުވަހަކީ އޮކްޓޯބަރު ހަތެކެވެ.
ކެމްޕެއިން ރޭވި ފަރާތުން ބުނީ ޔޫކްރެއިން ފައުޖަށް ބޭނުންވާ އިތުރު ތަކެތި ހޯދަން ކްރައުޑްފަންޑް ކުރުން ކުރިއަށް ގެންދާނެ ކަމަށެވެ. އެގޮތުން ޑްރޯން، ބުލެޓްޕްރޫފް ވެސްޓް އަދި ވަޒަން ހޯދަން ވެސް މަސައްކަތް ކުރާނެ ކަމަށް ބުންޏެވެ.
ޔޫކްރެއިން ހަނގުރާމަ ފެށި ފަހުން ހުޅަނގުގެ ގައުމުތަކުން އަންނަނީ ބޮޑެތި އަސްކަރީ އަދި މާލީ އެހީ ފޯރުކޮށްދެމުންނެވެ. އެމެރިކާއިން 15.1 ބިލިއަން ޑޮލަރުގެ އަސްކަަރީ އެހީ އަދި އިނގިރޭސިވިލާތުން 2.3 ބިލިއަން ޕައުންޑްގެ އެހީ ފޯރުކޮށްދީފައިވެ އެވެ.
