ޗެޗްނިޔާ ލީޑަރު ރަމްޒާން ކަޑީރޯވްގެ ފުރާވަރު އުމުރުގެ ތިން ފިރިހެން ދަރިން ވަރަށް އަވަހަށް ޔޫކްރެއިން ހަނގުރާމައިގައި ބައިވެރިވާނެ ކަމަށް އިއުލާނުކޮށްފި އެވެ.
އެ ކުދިންގެ އުމުރަކީ 14، 15 އަދި 16 އެވެ. ކަޑީރޯވްއަކީ ޔޫކްރެއިން ހަނގުރާމައިގައި ރަޝިއާގެ ރައީސް ލެޑިމިއަަ ޕުޓިންގެ އެންމެ މުހިއްމު އެއް ބައިވެރިޔާ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ކަޑީރޯވް ވިދާޅުވީ ކޮންމެ ބަފަޔަކު ވެސް ފިރިހެން ދަރިންނަށް އާއިލާ އާއި ރައްޔިތުން އަދި ގައުމު ހިމާޔަތް ކުރަން ދަސްކޮށްދޭން ޖެހޭނެ ކަމަށެވެ.
އުމުރުން 18 އަހަރުން ދަށުގެ ކުދިން ހަމަނުޖެހުންތަކުގަައި ސީދާ ބައިވެރިވުން ހުއްޓުވުމަށް ރަޝިއާއިން އދ. އާއެކު އެއްބަސްވުމެއްގައި ސޮއިކޮށްފައިވެ އެވެ.
އުމުރުން 15 އަހަރުން ދަށުގެ ކުދިން ހަމަނުޖެހުންތަކުގައި ބައިވެރި ކުރުމަކީ ހަނގުރާމައިގެ ކުށެއްގެ ގޮތުގައި ބައިނަލްއަގްވާމީ ކްރިމިނަލް ކޯޓުން ދެކެ އެވެ. އެކަމަކު ރަޝިއާއިން އެ ކޯޓު ބަލައެއް ނުގަނެ އެވެ.
ރަޝިއާގެ ދެކުނުގައި ވަކި ޖުމްހޫރިއްޔަތެއް ގޮތަށް އޮންނަ ޗެޗްނިޔާގައި 2007 ވަނަ އަހަރުން ފެށިގެން ވެރިކަން ކުރައްވަަނީ ކަޑީރޯވް އެވެ. ޗެޗްނިޔާގެ ރައީސް ކަމަށް ކަޑީރޯވް އައްޔަން ކުރެއްވީ ޕުޓިން އެވެ.
ކަޑީރޯވްއަކީ ޕުޓިންއަށް ވަރަށް ސަޕޯޓް ކުރައްވާ ލީޑަރެކެވެ. ފެބްރުއަރީ މަހު ޔޫކްރެއިން ހަނގުރާމަ ފެށުމާ އެކު ޗެޗްނިޔާއިން ވަނީ ސީދާ ބައިވެރިވާން ފަށައިފަ އެވެ.
