ހުޅުމާލެއިން ގެއްލުނު މުހައްމަދު އަޒުހާން ހޯދުމަށް ކުރިއަށް ގެންދިޔަ ތަހުގީގާމެދު އުފެދޭ ސުވާލުތަކަށް ޖަވާބު ދިނުމަށް މޯލްޑިވްސް ރިފޯމް މޫވްމަންޓު (އެމްއާރުއެމް) އިން ގޮވާލައިފި އެވެ.
އަޒުހާން ކަމަށް ބެލެވޭ މީހެއްހެ ހަށިގަނޑު ހުޅުމާލޭ ވޯޓާ ތީމް ޕާކުގެ ކުރިމަތިން އޮންނަ ހުސްބިމުން އިއްޔެ ފެނިފައިވާއިރު، އެމްއާރުއެމް އިން ނެރުނު ނޫސް ބަޔާނެއްގައި ބުނެފައިވަނީ އަޒުހާން ހޯދުމަށް ކުރިއަށް ގެންދިޔަ ތަހުގީގާއި މެދު އާންމުންގެ އެތަށް ސުވާލެއް އުފެދިފައިވާ މި ދަނޑިވަޅުގައި އެ ސުވާލުތަކަށް ޖަވާބު ދިނުމަށް ކަމާބެހޭ މުއައްސަސާތަކަށް ގޮވާލާކަމަށެވެ.
"އަޒުހާންގެ މަރުގެ މައްސަލަ ފުލުހުން 'ހޯމަސައިޑް' ތަހުގީގެއްގެ ގޮތުގައި ބަލަމުން އަންނަ އިރު، އޭނާ ހޯދުމަށް ފުލުހުން ހިންގާފައިވާ ތަހުގީގާއި މެދު ރައްޔިތުންގެ ގިނަ ކަންބޮޑުވުންތަކެއް އުފެދިފައިވޭ،" އެމްއާރުއެމްގެ ބަޔާނުގަިއ ބުނެފައިވެ އެވެ.
އަޒްހާން އެންމެ ފަހުން ފެނުނީ އޯގަސްޓް 18، ގައި ހުޅުމާލެ ރެޑްބުލް ދަނޑު ސަރަހައްދުން ކަމަށް ފުލުހުން މީގެ ކުރިން ބުނެފައިވެ އެވެ. އިއްޔެ ހަވީރު ފުލުހުން އަޒުހާން ކަމަށް ބެލެވޭ ހަށިގަނޑެއް ހޯދީ އެ ސަރަހައްދާ ދުރުނޫން ހިސާބަކުންނެވެ. އެއާއެކު އަޒުހާން ގެއްލި ދެ ހަފްތާ ވެގެން ދިޔައިރު އެ ސަރަހައްދު ނުބެލުނީ ކިހިނެއް ވެގެންތޯ ވެސް އެމްއާރުއެމްގެ ބަޔާނުގައި ސުވާލު އުފައްދާފައިވެ އެވެ. ގިނަ އާންމުންވެސް ސޯޝަލް މީޑިއާގައި ފުލުހުންނާއި މި ސުވާލު ވަނީ ކުރިމަތި ކުރުވާފަ އެވެ.
އެ މައްސަލައިގައި ރޭ ހުޅުމާލެ ސްކޭޓް ޕާކު ސަރަހައްދުގައި ނޫސްވެރިންނާ ބައްދަލުކުރި އެވެ. އެ ބައްދަލުވުމުގައި އޯގަނައިޒްޑް ކްރައިމްސް ޔުނިޓުގެ ހެޑު ސުޕްރިންޓެންޑެންޓް ހަސަން ސައީދު ވިދާޅުވީ ފުލުހުންގެ ތަހުގީގުގައި ބެލުނު ސީސީޓީވީ ކެމެރާތަކުން އަޒުހާން އެންމެ ފަހުން ފެނުނީ މަރުވެފައިވާ މީހާ ފެނުނު ސަރަހައްދަށްވުރު ތަންކޮޅެއް ދުރުން ކަމަށެވެ. ރެޑްބުލް ދަނޑާއި ވޯޓާ ޕަކު ސަރަހައްދު ކުރިން ބެލި ނަމަވެސް ހަށިގަނޑު ފެނުނު ސަރަހައްދު ފުލުހުން ބެލީ އިއްޔެ ކަމަށް ވެސް ސައީދު ވިދާޅުވި އެވެ.
އެމްއާރުއެމް ގެ ބަޔާނުގައި ތަހުގީގާމެދު އުފެދިފައިވާ ސުވާލުތަކާއި ކަންބޮޑުވުންތަކަށް ޖަވާބު ދިނުމަށް އެދި ފުލުހުންގެ ބޯޑަށާއި ނޭޝަނަލް އިންޓެގްރިޓީ ކޮމިޝަނަށް ވަނީ ގޮވާލާފަ އެވެ.
