މުޖުތަމައުގައި ދިރިއުޅުމުގެ ހާލަތު ކުރިއެރުވުން ފަދަ ކަންކަމަށް އެހީތެރިވުމަށް މޯލްޑިވްސް ޕޯޓްސް ލިމިޓެޑުން ކޮމިއުނިޓީ ފަންޑެއް އިފްތިތާހުކޮށްފި އެވެ.
އެމްޕީއެލްގެ 36 ވަނަ އަހަރީ ދުވަހާ ގުޅިގެން މި އިފްތިތާހުކުރި މި ކޮމިއުނިޓީ ފަންޑަކީ 600،000ރ. ގެ ފަންޑެކެވެ.
މި ފަންޑުން މުޖުތަމައުގައި އެހީތެރިކަން ބޭނުންވާ ފަރާތްތަކަށާއި މުޖުތަމައުގައި ދިރިއުޅުމުގެ ހާލަތު ކުރިއަރުވައި، ހިތްހަމަޖެހުމާއި ހިތްފަސޭހަ މާހައުލެއް ބިނާކުރުމަށް ފައިސާ ހަރަދުކުރާނެ ކަމަށް އެ ކުންފުނިން ބުނެ އެވެ.
ދެ ކެޓަގަރީއަކަށް ބަހާލައިގެން ކުރިއަށްގެންދާ މި ފަންޑުގެ ދަށުން ތިން މަސް ދުވަހަަށް ވުރެ ގިނަ ދުވަސް ނުވާ އަށް ޕްރޮޖެކްޓަކަށް އަދި އަަހަރަކަށް ވުރެ ގިނަ ދުވަސް ނުވާ ޕްރޮޖެކްޓަކަށް ފަންޑުކޮށްދޭނެ އެވެ. ފުރަތަމަ ކެޓަގަރީގައި ހޮވާލެވޭ ޕްރޮޖެކްޓުތަކަށް 50،000ރ. ދިނުމަށް ނިންމާފައިވާއިރު ދެވަނަ ކެޓަގަރީގެ ދެ ޕްރޮޖެކްޓަށް 100،000ރ. ދޭނެ އެވެ.
މުޖުތަމައާ ގުޅުން ހުރި ޖަމިއްޔާތަކަށާއި މަދަނީ ޖަމިއްޔާތަކާއި އެހީ ނުވަތަ ޗެރިޓެބްލް އޮގަނައިޒޭޝަންތަކުގެ އިތުރުން ކްލަބް ޖަމިއްޔާތަކަށް ވެސް ކޮމިއުނިޓީ ފަންޑަށް ކުރިމަތިލެވޭނެ ކަމަށް އެމްޕީއެލުން ބުނެ އެވެ. ފައިނޭންޝަލް ޕްލޭން އަދި ދެމެހެއްޓެނިވި ގޮތެއްގައި އެ ޕްރޮޖެކްޓެއްގެ ހިދުމަތް ލިބޭނެ ގޮތަކަށް ހުށަހަޅާ ޕްލޭންތަކަށް އިސްކަން ދޭނެ ކަމަށް ވެސް ބުނެފައިވެ އެވެ.
