އިނގިރޭސިވިލާތުގެ ރާނީ އެލިޒަބަތު ދެ ވަނަ ވިންޑްސާގައި ފަސްދާނުލާފައި އޮތް ތަނުގެ ފުރަތަމަ ފޮޓޯ ބަކިންހަމް ޕެލެސްއިން އާއްމުކޮށްފި އެވެ.
ރާނީ ފަސްދާނުލީ މިދިޔަ ހޯމަ ދުވަހު ޖޯޖް ހަ ވަނަ މެމޯރިއަލް ޗޭޕަލްގަ އެވެ. އެ ތަނުގެ ތަޅުންގަނޑުގައި ކަޅު ކުލައިގެ މާބްލް ހަރުކޮށްފަައިވެ އެވެ.
އެ މާބްލް ހަރު ކުރީ ރާނީ އާއި އެކަމަނާގެ މަންމާފުޅާއި ބައްޕާފުޅު އަަދި ފިރިކަލުންގެ ހަނދާނުގަ އެވެ.
މީގެ ކުރިން އެ ތަނުގައި ހަރުކޮށްފައި ހުރީ ބައްޕާފުޅު އަދި ރަސްގެފާނު ޖޯޖް ހަ ވަނަ އާއި މަންމާފުޅު އެލިޒަބަަތުގެ ހަނދާނުގައި ކަޅު މާބްލްއެކެވެ.
އަލަށް ހަރު ކުރި މާބްލްގައި ރާނީ އެލިޒަބަތު ދެ ވަނަ އާއި ފިރިކަލުން ފިލިޕްގެ ނަންފުޅު ވެސް ހިމަނާފައިވެ އެވެ. އޭގައި ލިޔެފައި ވަނީ "ޖޯޖް ހަ ވަނަ 1895-1952، އެލިޒަބަތު 1900-2002" އަދި ދަގަނޑު ތަރިއެއްގެ ތިރީގައި "އެލިޒަބަތު ދެ ވަނަ 1926-2022 އަދި "ފިލިޕް 1921-2021" އެވެ.
އެ ފައްޅިއަކީ 1962 ވަނަ އަހަރު ރާނީ އެލިޒަބަތު ދެ ވަނަ ބައްޕާފުޅުގެ ހަނދާނުގައި ހެދި ޒިޔާރަތެކެވެ. ރާނީ ކޮއްކޯފުޅު އަމީރާ މާގަރެޓް 2002 ވަނަ އަހަރު އަަވަހާރަވުމުން، އެކަމަނާގެ ހަށިގަނޑު އަންދާލުމަށް ފަހު އަޅިތައް ވެސް ބެހެއްޓީ އެ ތަނުގަ އެވެ.
އަންނަ ބުރާސްފަތި ދުވަހުން ފެށިގެން އާއްމުންނަށް އެ ތަަނަށް ޒިޔާރަތް ކުރެވޭނެ އެވެ. އާދީއްތަ ދުވަސް ފިޔަވައި ކޮންމެ ދުވަހަކު އާއްމުންނަށް ހުޅުވާލާނެ ކަމަށް ފައްޅިން ބުނެ އެވެ. އާދީއްތަ ދުވަސް ހާއްސަކުރަނީ ހަމައެކަނި ފައްޅީގައި އަޅުކަން ކުރާ މީހުންނަށެވެ.
އެ ފައްޅި ހުންނަ ގަނޑުވަރަށް ވަންނަން އުމުރުން 18 އަހަރުން މަތީގެ މީހުން އަަތުން ނަގާނީ ހޮނިހިރު ދުވަހު 28.50 ޕައުންޑެވެ. އަަދި އެހެން ދުވަސްތަކުގައި ނަގާނީ 26.50 ޕައުންޑެވެ.
