ޔޫކްރެއިން ހަނގުރާމައިގައި ނިޔުކްލިއާ ހަތިޔާރު ބޭނުން ކުރަން ޖެހިދާނެ ކަމަށް ރަޝިއާގެ ރަައީސް ލެޑިމިއަ ޕުޓިން ދެއްވާ އިންޒާރުތަކާ މެދު ސީރިއަސް ވާން ޖެހޭ ކަމަަށް ޔޫރަޕިއަން ޔޫނިއަން (އީޔޫ) ގެ ހާރިޖީ ސިޔާސަތާ ބެހޭ ވެރިޔާ ވިދާޅުވެއްޖެ އެވެ.
ޖޯސެފް ބޮރެލް ބީބީސީއަށް ވިދާޅުވީ ހަނގުރާމަ މިހާރު އޮތީ ނުރައްކާތެރި ހިސާބެއްގައި ކަމަށެވެ. އޭނާ އެހެން ވިދާޅުވި އިރު، ހަނގުރާމައިގެ މައިދާނަށް ރަޝިއާ ސިފައިން ރިޒާވް ފައުޖު ނެރެން ނިންމައި، ޔޫކްރެއިން ހަތަރު ހިސާބެއް ރަޝިއާގެ ދަށަށް ގެންދިޔުމަށް ފެންނަ ނުފެންނަ ވޯޓަށް އިއުލާންކޮށްފައިވެ އެވެ.
ރަޝިއާގެ އެ ނިންމުންތައް އައީ ހަނގުރާމަައިގައި ޔޫކްރެއިނުން ކުރިއެރުންތަކެއް ހޯދައި، ބައެއް އަވަށްތަކުން ރަޝިއާގެ ސިފައިން ފައިބައިގެން ދިޔަ ފަހުންނެވެ.
"ހަމަ ޔަގީނުން ވެސް މިއީ ނުރައްކާތެރި ވަގުތުކޮޅެއް. އެއީ ރަޝިއާ ސިފައިން އެ ތިބީ މިހާރު ކަނެއްގައި ބަންދުވެފައި. ޕުޓިން ރައްދު ދެއްވީ ނިޔުކްލިއާ ހަތިޔާރުގެ އިންޒާރުން. އެހެންވީމާ ނުރައްކާ ވަރަށް ބޮޑު،" ބޮރެލް ވިދާޅުވި އެވެ.
އޭނާ ވިދާޅުވީ ޔޫކްރެއިންގެ އިސްތިގްލާލާއި ބިމުގެ ސަރަހައްދު ކަށަވަރުވާ ޑިޕްލޮމެޓިކް ހައްލެއް ހޯދަން ޖެހޭ ކަމަށާއި އެހެން ނުވާ ނަމަ ހަނގުރާމަ ނިމުނަސް ކުރިމަގުގައި ސުލްހަ ނޯންނާނެ ކަމަށެވެ.
ފާއިތުވި ހަފްތާގައި ގައުމާ މުހާތަބު ކުރައްވައި ޕުޓިން ވިދާޅުވީ ވަރުގަދަ އެތައް ހަތިޔާރެއް ރަޝިއާގެ އަަތުގައި އެބަހުރި ކަމަށާއި އަތުގައި ހުރި އެއްޗެއް ބޭނުން ކުރަން ފަސްނުޖެހޭނެ ކަމަށެވެ.
