ސަތޭކަ އަށްވުރެ ގިނަ މީހުން ގޮވައިގެން ލުބުނާނުން ފުރައިގެން ދަތުރުކުރަމުންދިޔަ ރެފިއުޖީންގެ ބޯޓެއް ސީރިއާގެ އައްސޭރިއަށް ބަންޑުން ޖަހާލައި 60 އަށްވުރެ ގިނަ މީހުން މަރުވެ، އެތައް ބަޔަކު ކަނޑުވެއްޖެ އެވެ.
މި ހާދިސާގައި ކަނޑުވި މީހުންގެ ތެރޭން ސަލާމަތްވި 20 މީހުންނަށް ތަރްތޫސްގައި ހުންނަ ބޭސަލް ހޮސްޕިޓަލުގައި ފަރުވާ ދެމުން އަންނަ ކަމަށް ސީރިއާގެ ހެލްތު މިނިސްޓަރީއާ ހަވާލާދީ ބޭރުގެ ނޫސް އޭޖެންސީތަކުން ރިޕޯޓުކޮށްފައިވެ އެވެ. މީގެ އިތުރުން، މިހާތަނަށް މި ހާދިސާގައި މަރުވެފައިވާ 61 މީހެއްގެ ހަށިގަނޑު ފެނިފައިވާކަން ވެސް ސީރިއާގެ ހެލްތު މިނިސްޓަރީއިން ކަށަވަރު ކޮށްދީފައިވެ އެވެ.
ބޭސަލް ހޮސްޕިޓަލުގައި ފަރުވާ ހޯދަމުންދާ މީހުންނާއި ހަވާލާދީ ސީރިއާގެ ޓުރާންސްޕޯޓު މިނިސްޓަރީން ބުނީ ލުބުނާނުން މިބޯޓު މިދިޔަ އަންގާރަ ދުވަހު ފުރީ 120 އާއި 150ހާއި ދެމެދުގެ އަދަދަކަށް މީހުން ގޮވައިގެން ކަމަށެވެ.
ބޯޓު ބަންޑުން ޖަހާލިއިރު މިބޯޓުގައި މެދުއިރުމަތީގެ އެކި ގައުމުތަކަށް ނިސްބަތްވާ މީހުން ތިބި ކަމަށް ސީރިއާގެ ސްޓޭޓު މީޑިޔާއިން ރިޕޯޓުކޮށްފައިވެ އެވެ.
ގަދަ ވަޔާއި އެކު ކަނޑު ގަދަވުމުގެ ސަބަބުން މީހުން ހޯދުމުގެ މަސައްކަތުގައި ދަތިތަކެއް ހުރި ނަމަވެސް ސީރިއާގެ ކޯސްޓުގާޑުން ދަނީ ހުއްޓުމެއްނެތި އަދިވެސް މީހުން ހޯދުމުގެ މަސައްކަތް ކުރަމުންނެވެ.
2019 ވަނަ އަހަރުގެ ފަހުކޮޅުން ފެށިގެން އިގްތިސޯދީ ހީނަރުކަމެއް ކުރިމަރިވެފައިވާ ލުބުނާނަކީ ހަ މިލިއަން މީހުންގެ އާބާދީއެއް އޮންނަ ކުޑަ ގައުމެކެވެ. އެ ގައުމުގެ ރައްޔިތުންގެ އިތުރުން ސީރިއާއިން އެ ގައުމަށް ހިޖުރަކޮށްފައިވާ އެއް މިލިއަނަށްވުރެ ގިނަ މީހުން އެ ގައުމުގައި ދިރިއުޅެ އެވެ. އެ ގައުމަށް ކުރިމަތިވެފައިވާ އިގްތިސޯދީ ހީނަރުކަމުގެ ސަބަބުން އެތައް ހާސް ބަޔަކުދަނީ އެ ގައުމު ދޫކޮަށް އެހެން ގައުމުތަކަށް ހިޖުރަކުރުމަށް މަސައްކަތް ކުރަމުންނެވެ.
