ރަޝިއާއިން ކޮންޓްރޯލް ކުރާ ޔޫކްރެއިންގެ ހަތަރު ސަރަހައްދަކުން ޔޫކްރެއިނާ ވަކިވެ ރަޝިއާއާ ގުޅުމަށް ފެންނަ ނުފެންނަ ވޯޓަކަށް ދާން ތައްޔާރުވެއްޖެ އެވެ.
އިރުމަތީ ޔޫކްރެއިން ސަރަހައްދުތައް ރަޝިއާއިން ކޮންޓްރޯލް ކުރި ނަމަވެސް، މި މަހުގެ ތެރޭގައި ޔޫކްރެއިނުން ވަނީ އޭގެ ތެރެއިން ބައެއް ތަންތަނުގެ ކޮންޓްރޯލް އަލުން ހޯދައިފަ އެވެ.
އިރުމަތީ އަދި ދެކުނުގައި ރަޝިއާއިން އައްޔަނުކޮށްފައިވާ އޮފިޝަލުން ބުނީ މި ހަފުތާއިން ފެށިގެން ފެންނަ ނުފެންނަަ ވޯޓުލުމުގެ މަސައްކަތް ކުރާނެ ކަމަށެވެ.
ޔޫކްރެއިންގެ ކްރައިމިއާއަކީ ރަޝިއާގެ ތަނެއްގެ ގޮތުގައި ހެދީ 2014 ވަނަ އަހަރު އެފަދަ ވޯޓަކަށް ފަހު އެވެ. އެ ފަހަރު ބައިނަލްއަގްވާމީ ފަރާތްތަކުން ރަޝިއާއަށް ފާޑުކިޔެވެ.
ޔޫކްރެއިންގެ ފޮރިން މިނިސްޓަރު ޑިމިޓްރޯ ކުލެބާ ވިދާޅުވީ ނަމެއްގައި ބާއްވާ ފެންނަ ނުފެންނަ ވޯޓުތަކުން އެއްވެސް ކަމެއް ބަދަލު ނުކުރެވޭނެ ކަމަށެވެ.
ކްރައިމިއާއަކީ ރަޝިއާގެ ތަނެއްގެ ގޮތުގައި ހެދި ނަމަވެސް، ބައިނަލްއަގްވާމީ މުޖުތަމައިން އެކަން ބަލައިގެންފައެއް ނުވެ އެވެ. އެކަމަކު ހަނގުރާމައިގައި ރަޝިއާއިން ހިފާ އެހެން ތަންތަނަށް ވެސް އެގޮތަށް ހަދާނެ ކަމަށް ކުރިން ވެސް އޮތީ ބެލެވިފަ އެވެ.
މިހާތަނަށް ފެންނަ ނުފެންނަ ވޯޓު ނަގަން އިއުލާން ކުރީ ޑޮނެސްކް، ލުހާންސް، ހާސަން އަދި ޒަޕޮރިއްޒިޒިއާގަ އެވެ. ރަޝިއާއިން ބުނީ ވޯޓުލާ މަރުކަޒަށް ގޮސް އަދި ރިމޯޓުކޮށްވެސް ވޯޓުލެވޭނެ ކަމަށެވެ.
