އިނގިރޭސި ތަހުތުގައި 70 އަހަރު ހޭދަކުރެއްވި ރާނީ އެލިޒަބަތު ދެ ވަނައިގެ ރަސްމީ ޖަނާޒާ ހޯމަ ދުވަަހު ބާއްވައިފި އެވެ.
ޖަނާޒާ އޮތީ ހޯމަ ދުވަހުގެ ހެނދުނު 11:00 ޖެހި އިރު (ރާއްޖޭގެ ގަޑިން މެންދުރު ފަހު 03:00) ލަންޑަންގެ ތާރީހީ ފައްޅި ވެސްޓްމިންސްޓާ އަބޭގަ އެވެ.
އެ ތަނަކީ ހުރިހާ އިނގިރޭސި ރާނީންނާއި ރަސްކަލުންގެ ތާޖުކޮޅު ތުރުކުރެއްވުމުގެ ރަސްމީ ހަފުލާ ޒަމާނުއްސުރެ ބާއްވާ ފައްޅި އެވެ.
މިދިޔަ ބުދަ ދުވަހުން ފެށިގެން ވެސްޓްމިންސްޓާ ހޯލްގައި އާއްމުންނަށް ރާނީގެ ސަންދޯއް ދައްކާލުމަށް ފަހު، އެ ފުރުސަތު ބަންދު ކުރީ ހޯމަ ދުވަހުގެ ހެނދުނު 06:30 ގަ އެވެ.
އޭގެ ފަހުން ވެސްޓްމިންސްޓާ އަބޭގެ ދޮރުތައް މެހެމާނުންނަށް ހުޅުވާލުމާ އެކު، ބަސްތަކުގައި އެ ފަރާތްތައް ފައްޅިއަށް ދަތުރު ކުރި އެވެ.
ރާނީގެ ޖަނާޒާއަށް ނެރުނު އުސޫލުގައި ބުނީ ޕާކިން އަދި ސެކިއުރިޓީ ސަަބަބުތަކާ ހެދި ޕްރައިވެޓް ކާރުގައި ދަތުރު ނުކުރުމަށް އެދޭ ކަމަށެވެ.
އުރުދުންގެ ރަސްގެފާނާއި ރާނީގެ އުތުރުން ޖަޕާނުގެ އެމްޕެރާ ވެސް އިއްޒަތްތެރިންގެ ތެރޭގައި ހިމެނިވަޑައިގަންނަވާ.
އެހެންވެ، ޖަނާޒާއަށް ދަައުވަތު ލިބުނު 2000 މެހެމާނުންގެ ތެރޭގައި ހިމެނޭ ގައުމުތަކުގެ ވެރިންނާއި އިއްޒަތްތެރިން ވެސް ވަޑައިގެންނެވީ ބަހުގައި ކަމަށްވެ އެވެ.
ވެސްޓްމިންސްޓާ ހޯލުން ވެސްޓްމިންސްޓާ އަބީ ފައްޅިއަށް ރާނީގެ ސަންދޯއް ގެންދިޔައީ ސިފައިންނާއި، ރަސްގެފާނު ޗާލްސް ތިން ވަނަ އަދި ޝާހީ އާއިލާގެ އެހެން ބޭފުޅުން ހިމެނޭ ހާއްސަ ހިނގާލުމަކާ އެކު އެވެ.
ޖަނާޒާ ކުރިއަށް ގެންދިޔަ ފައްޅިއަކީ 1947 ގައި އެކަމަނާ އާއި އަމީރު ފިލިޕްގެ ކައިވެނިފުޅު އޮތް ފައްޅި އެވެ. އޭގެ އިތުރުން ރާނީ ތަހުތަށް ވަޑައިގެން ތާޖު ތުރުކުރެއްވީ 1953 ގައި އެ ފައްޅީގަ އެވެ.
ޖަނާޒާ ނިންމާލުމުގެ ގޮތުން ދެ މިނެޓުގެ ހަމަހިމޭންކަމުގެ ސުކޫތެއް މުޅި އިނގިރޭސިވިލާތުގައި ފާހަގަކޮށް، ފައްޅީގައި ގައުމީ ސަލާން ޖެހި އެވެ.
ރާނީގެ ސަަންދޯއް ވިންޑްސާ ކާސްލްއަށް ގެންގޮސް، މިރޭ އެ ތަނުގައި އޮންނަ ޕްރައިވެޓް ޖަނާޒާއަަކަށް ފަހު ވަޅުލާާނީ ސެއިންޓް ޖޯޖަޒް ޗޭޕަަލް ތެރޭގައި ހުންނަ ކިންގް ޖޯޖް ހަ ވަނަ މެމޯރިއަލް ޗޭޕަލްގަ އެވެ.
އެއީ ރާނީގެ މަންމާާފުޅާއި ބައްޕާފުޅުގެ ސަންދޯއް ކައިރީގަ އެވެ. އޭގެ އިތުރުން މިދިޔަ އަހަރު އަވަހާރަވި ރާނީގެ ފިރިކަލުން ފިލިޕްގެ ސަންދޯއް ވެސް ރޯޔަލް ވޯލްޓުން ނަގައި، ރާނީއާ އެކު ފަސްދާނުލާނެ އެވެ.
