އިނގިރޭސިވިލާތުގެ ރާނީ އެލިޒަަބަތުގެ ޖަނާޒާގައި ބައިވެރިވެވަޑައިގެންނެވުމަަށް ބޭރު ގައުމުތަކުގެ ވެރިންނާއި އިއްޒަތްތެރިން ބަހުގައި ވެސްޓްމިންސްޓާ އަބޭއަށް ދަތުރު ކުރައްވައިފި އެވެ.
ޖަނާޒާ ބޭއްވުމަށް ހަމަޖެހިފައި ވަނީ އިނގިރޭސިވިލާތުގެ ގަޑިން ހެނދުނު 11:00 (ރާއްޖެ ގަޑިން މެންދުރު ފަހު 03:00) ޖަހާ އިރު އެވެ.
ޖަނާޒާ އޮންނަނީ ލަންޑަންގެ ތާރީހީ ފައްޅި ވެސްޓްމިންސްޓާ އަބޭގަ އެވެ. އެ ތަނަކީ ހުރިހާ އިނގިރޭސި ރާނީންނާއި ރަސްކަލުންގެ ތާޖުކޮޅު ތުރުކުރެއްވުމުގެ ރަސްމީ ހަފުލާ ޒަމާނުއްސުރެ ބާއްވާ ފައްޅި އެވެ.
ހޯމަ ދުވަހުގެ ހެނދުނު ވެސްޓްމިންސްޓާ އަބޭގެ ދޮރުތައް ހުޅުވާާލުމާ އެކު، މެހެމާނުން ވަނީ އެ ތަނަށް ދަތުރު ކުރަން ފަަށައިފި އެވެ. ދެހާސް މެހެމާނުންނަށް ދައުވަތު ފޮނުވާފައިވާ އިރު، އޭގެ ތެރޭގައި 500 ވެރިންނާއި ބޭރުގެ އިއްޒަތްތެރިން ހިމެނެ އެވެ.
ޖަނާޒާއަށް ނެރުނު އުސޫލުގައިވާ ގޮތުން ޕްރައިވެޓް ކާރުގެ ބަދަލުގައި ހުރިހާ ވެރިން ވެސް ދަތުރު ކުރައްވަން ޖެހޭނީ ހާއްސަ ބަސްތަަކެއްގަަ އެވެ.
ބަސްތައް ހުރި ސަރަހައްދަށް ކާރުކޮޅުގައި ވަޑައިގެން، އެއަށްފަހު ބަހުގައި ވެސްޓްމިންސްޓާ އަބޭއަށް ދަަތުރު ކުރެއްވުމަށް އަންގާފައިވެ އެވެ.
ގިނަ އަދަދެއްގެ ބަސްތައް ވެސްޓްމިންސްޓާ އަބޭއަށް ވަންނަ މަންޒަރު ވީޑިއޯތަކުން ފެނިފައިވާ އިރު، ބައެއް ރިޕޯޓުތައް ބުނާ ގޮތުން އެމެރިކާގެ ރައީސް ޖޯ ބައިޑެން ސެކިއުރިޓީ ސަބަބުތަކާ ހެދި ދަތުރު ކުރައްވާނީ ކާރުކޮޅުގަ އެވެ.
ރާނީ އެލިޒަބަތު ދެ ވަނަ އުމުރުފުޅުން 96 އަހަރުގައި އަވަހާރަވީ ސެޕްޓެމްބަރު އަށް ވަނަ ދުވަހު އެވެ. އެ ދުވަހުން ފެށިގެން އިނގިރޭސިިލާތުގައި ދަނީ ގައުމީ ހިތާމަ ފާޅުކުރުމުގެ ދުވަސްތަކެއް ފާހަގަކުރަމުންނެވެ. ރަސްމީކޮށް ގައުމީ ހިތާމަ ފާޅުކުރުން ނިންމާލާނީ ހޯމަ ދުވަހު އެކަމަނާގެ ޖަނާޒާއަށް ފަހު އެވެ.
