އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސަންދޯއް ބެލުމަށް ވެސްޓްމިންސްޓާ ހޯލް ތެރެއަށް ސަފުގައި ހުރެ ވަން މީހަކު ސަންދޯކާ ކައިރިއަށް ދާން އުޅުމުން ހައްޔަރުކޮށްފި އެވެ.
އޭނާ ހައްޔަރު ކުރީ އާއްމު މަސްލަހަތަށް ގެއްލުން ދޭން އުޅުނުކަމުގެ ތުހުމަތުގަ އެވެ. އޭނާ މިހާރު ހުރީ ފުލުހުން ބަންދުގަ އެވެ.
އިނގިރޭސިވިލާތުގެ ގަޑިން ހުކުރު ދުވަހުގެ ރޭ އެ ހާދިސާ ހިނގި ވަގުތު، ރާނީގެ ސަންދޯއް ދެއްކުމަށް ކުރިއަށް ގެންދާ ލައިވް ބްރޯޑްކާސްޓް ކުޑަ އިރުކޮޅަކަށް މެދުކަނޑާލި އެވެ.
ހުކުރު ދުވަހުގެ ރޭ އެ ހާދިސާ ހިނގުމުގެ ކުރިން ޝާހީ އާއިލާގެ ބައެއް މެމްބަރުން ވަނީ ވެސްޓްމިންސްޓާ ހޯލަށް ވަޑައިގެން ރާނީގެ ހަނދާން އާ ކުރައްވައިފަ އެވެ.
އެގޮތުން ރާނީގެ ދޮށީ ދަރިކަލުން އާ ރަސްގެފާނު ޗާލްސް ތިން ވަނަ އާއި ރާނީގެ އަނެއް ތިން ބޭފުޅުން، އަމީރާ އޭން، އަމީރު އެންޑްރޫ އަދި އަމީރު އެޑްވާޑް ބައިވެރިވެވަޑައިގެންނެވި އެވެ.
ސެޕްޓެމްބަރު އަށް ވަނަ ދުވަހު އަވަހާރަވި ރާނީ އެލިޒަބަތު ދެ ވަނައިގެ ސަންދޯއް ވެސްޓްމިންސްޓާ ހޯލްގައި އޮންނާނީ ސެޕްޓްމްބަރު 19 އާ ހަމައަށެވެ.
