އިނގިރޭސިވިލާތުގެ ޝާހީ ގަނޑުވަރު ބަކިންހަމް ޕެލެސްއިން ފެށި ރަސްމީ ހިނގާލުމަކަށް ފަހު ރާނީ އެލިޒަބަތު ދެ ވަނައިގެ ސަންދޯއް ވެސްޓްމިންސްޓާ ހޯލަށް ގެންގޮސްފި އެވެ.
އިނގިރޭސިވިލާތުގެ ގަޑިން މިއަދު މެންދުރު ފެށި ހިނގާލުމުގައި އިސްކޮށް ތިއްބެވީ ރާނީގެ ދޮށީ ދަރިކަލުން ރަސްގެފާނު ޗާލްސް ތިން ވަނަ އާއި އެކަމަނާގެ އަނެއް ތިން ބޭފުޅުންނެވެ.
އިނގިރޭސި ޕާލިމެންޓް ނުވަތަ ޕެލެސް އޮފް ވެސްޓްމިންސްޓާ އަށް ވަޑައިގެންނެވުމަށް 38 މިނެޓުގެ ހިންގެވުން ކުރިއަށް ދިޔަ އިރު، ލަންޑަންގެ ބޮޑު ގަޑި ބިގް ބެންއިން އިން ދިޔައީ ރަނގަބީލު ޖަހަމުންނެވެ.
ޝާހީ އާއިލާގެ އިތުރު މެމްބަރުން ކަމުގައިވާ ވަލީ އަހުރު އަމީރު ވިލިއަމް އާއި އަމީރު ހެރީ ވެސް ހިންގެވުމުގައި ބައިވެރިވެވަޑަައިގެންނެވި އެވެ.
އިނގިރޭސި ސިފައިންގެ ހާހެއްހާ މެމްބަރުން ވެސް ހިނގާލުމުގައި ބައިވެރިވި އެވެ. ރަސްގެފާާނާއި އަމީރާ އޭން އަދި އަމީރު އެޑްވާޑްގެ އިތުރުން ވަލީ އަހުދު ވިލިއަމް ތިއްބެވީ އަސްކަރީ ޔުނިފޯމްގަ އެވެ.
ކުރިއަށް އޮތް ހަތަރު ދުވަހު ރާނީގެ ސަންދޯއް ވެސްޓްމިންސްޓާާ ހޯލްގައި ބޭއްވުމަށް ހަމަޖެހިފައިވާ އިރު، އާއްމުންނަށް ސަންދޯއް ބެލުމުގެ ފުރުސަތު ލިބެ އެވެ.
އެކަމަނާގެ ސަންދޯއް ލަންޑަނަށް ގެނައުމުގެ ކުރިން އެ ސަރަހައްދުގައި އާއްމުން ވަނީ ސަފު ހަދަން ފަށައިފަ އެވެ. އެޑިންބަރާގައި ވެސް އެތައް ހާސް ބަޔަކު ސަންދޯއް ބަލަން ޖަމާވި އެވެ.
މިދިޔަ ބުރާސްފަތި ދުވަަހު އުމުރުފުޅުން 96 އަހަރުގައި އަވަހާރަވި ރާނީގެ ޖަނާޒާ އޮންނާނީ ސެޕްޓެމްބަރު 19 ގަ އެވެ. އެ ދުވަހާ ހަމައަށް ސަންދޯއް އޮންނާނީ ވެސްޓްމިންސްޓާ ހޯލްގަ އެވެ.
