މިދިޔަ ބުރާސްފަތި ދުވަަހު އަވަހާރަވި އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސަންދޯއް ބަލަން ހޯމަ ދުވަހުގެ ރެއިން ފެށިގެން ގިނަ ބަޔަކު އެޑިންބަރާގައި ސަފު ހަދައިފި އެވެ.
އެކަމަނާގެ ސަންދޯއް މިހާރު ބާއްވާފައި އޮތީ ސެއިންޓް ގައިލްސަސް ކެތީޑްރަލްގަ އެވެ. ރާނީއަށް އިހްތިރާމް އަދާކުރުމުގެ ގޮތުން ސަންދޯއް ބަލަން ދާން ބޭނުން މީހުން ސަފު ހަދަން ފެށީ ހޯމަ ދުވަހުގެ ރެ އެވެ.
ކިޔުގައި ތިބި މީހުންނަށް ހޫނު ބުއިންތަކާއި ކެއުން ފޯރުކޮށްދިނުމުގައި ފައްޅީގެ އުޅަނދުތައް ހަރަކާތްތެރިވި އެވެ. ކިޔުގައި ތިބި މީހުންނަށް ފާހާނާ ކުރެވޭނެ އިންތިޒާމް ވެސް ހުރީ ހަމަޖައްސާފަ އެވެ.
ސްކޮޓްލޭންޑްގެ ސަރުކާރުން ބުނީ މިހާތަނަށް 26،000 އަށް ވުރެ ގިނަ މީހުން ސަންދޯއް ބަލާފަައިވާ ކަމަށާއި މިހާާރު ކިޔު ބަންދުކޮށްފައިވާ ކަމަށެވެ.
އެޑިންބަރާއިން ރާނީގެ ސަންދޯއް ލަންޑަނަށް ގެންދާނީ އަންގާރަ ދުވަހު އެވެ. ލަންޑަންގެ ވެސްޓްމިންސްޓާ ހޯލްގައި އަންނަ ހޯމަ ދުވަހާ ހަމައަށް ސަންދޯއް ބާއްވާނެ އެވެ.
