ހަނގުރާމައިގައި ޔޫކްރެއިނުން ކުރިއެރުން ހޯދަމުން ދާތީ ރަޝިއާގެ އަމާޒަކީ ކަރަންޓު ކަނޑައި "އަލިކަމާއި ހޫނުން ރަައްޔިތުން މަހުރޫމް ކުރުން" ކަަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ރިޕޯޓުތައް ބުނާ ގޮތުން އިރުމަތީ ހާރްކީވް އާއި ޑޮނެސްކް ސަރަހައްދުން ކަރަންޓު ކެނޑުމުގެ އަސަރު އެތައް މިލިއަން މީހުންނަަށް ކުރި އެވެ. ހާރްކީވްގެ މޭޔަރު ވިދާޅުވީ މިހާރު ކަރަންޓު ލިބެމުންދާ ކަމަށެވެ.
ޔޫކްރެއިންގެ އިރުމަތީގެ ބޮޑު ބަޔަކަށް އާދީއްތަ ދުވަހުގެ ރޭ އަނދިރިކަން ކުރިމަތިވި އިރު، ޔޫކްރެއިނުން ވަނީ 3،000 އަކަ ކިލޯމީޓަރުގެ ސަރަހައްދަކުން ރަޝިއާ ސިފައިން ފައްސާލާފައިވާ ކަމަށް ބުނެފަ އެވެ.
ހާރްކީވްގެ މޭޔަރު އިހޯރް ޓެރެހޯވް ވިދާޅުވީ އާދީއްތަ ދުވަހުގެ ރޭ ދިން ހަމަލާތަކެއްގެ ސަބަބުން ކަރަންޓާއި ފެން ކެނޑުނު ކަމަށެވެ. ހަމަލާތަކާ ގުޅިގެން އަލިފާން ވެސް ރޯވި އެވެ.
ސޯޝަލް މީޑިއާ ޕޯސްޓެއްގައި ރައީސް ޒެލެންސްކީ ވިދާޅުވީ އެއީ ރަޝިއާއިން ހިންގި "ޓެރަރިސްޓް އަމަލެއް" ކަމަށާއި އާއްމުންގެ އިންފްރާސްޓްރަކްޗާއަށް އަމާޒުކޮށްގެން ނުވާނެ ކަމަށެވެ.
އިރުމަތީ ޔޫކްރެއިންގެ ގިނަ އަވަށްތަކެއްގެ ކޮންޓްރޯލް ޔޫކްރެއިނުން އަނެއްކާވެސް ހޯދާފައިވާ އިރު، އެ ތަންތަން އަލުން ހިފުމަށް ރަޝިއާއިން މަސައްކަތް ކުރާނެ ކަމަށް ބެލެވެ އެވެ.
