އިންޑިއާ އާއި ޕާކިސްތާން އަދި ޗައިނާ އާއި ރަޝިއާ ބައިވެރިވާ ސަރަހައްދީ ސަމިޓެއްގައި ބޮޑު ވަޒީރު ނަރެންދްރަ މޯދީ ބައިވެރިވެވަޑައިގަންނަވާނެ ކަމަށް އިންޑިއާއިން ބުނެފި އެވެ.
ރަޝިއާއިން ބުނެފައި ވަނީ އުޒްބެކިސްތާނުގައި އޮންނަ ސަމިޓުގައި ރަޝިއާގެ ރައީސް ލެޑިމިއަ ޕުޓިން އަދި ޗައިނާގެ ރައީސް ޝީ ޖިންޕިންގެ ސީދާ ބައްދަލުވުމެއް އޮންނާނެ ކަމަށެވެ.
އެ ސަމިޓަކީ ޝަންހާއީ ކޯޕޮރޭޝަން އޯގަނައިޒޭޝަން (ސީއެސްއޯ) ސަމިޓެވެ. ސީއެސްއޯގައި ހިމެނެނީ ޗައިނާ، ރަޝިއާ، ކަޒަކިސްތާން، ކިރްގިޒްތާން، އުޒްބެކިސްތާން، ތަޖިކިސްތާން، އިންޑިއާ އަދި ޕާކިސްތާނެވެ.
ސީއެސްއޯ ސަމިޓު އޮންނާނީ ސެޕްޓެމްބަރު 15 އަދި 16 ގަ އެވެ. ރަޝިއާއިން ޗައިނާއަށް ކަނޑައަޅާފައި ހުންނަ ސަފީރު ވިދާޅުވީ ޕުޓިން އާއި ޝީގެ ބައްދަލުވުމެއް އޮންނާނެ ކަމަށެވެ.
އިންޑިއާ ސަަރުކާރުން ނެރުނު ބަޔާނުގައި ބުނީ މޯދީ ސަމިޓުގައި ބައިވެރިވެވަޑައިގަންނަވާނެ ކަމަށެވެ. ނަމަވެސް ޕުޓިން ނުވަތަ ޝީއާއެކު ވަކިން ބައްދަލުކުރަައްވާނެކަން ސާފެއް ނޫނެވެ.
