ސީރިއާ އާއި ލުބްނާން ގުޅޭ ބޯޑަރު ކައިރީގައި ހިނގި ޓްރެފިކް އެކްސިޑެންޓަަކަށް ފަހު ގިނަ އަދަދެއްގެ މަސްތުވާތަކެތި ފެނިފައިވާ ކަމަށް ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނެފި އެވެ.
އެ ހާދިސާ ހިނގީ ލުބްނާންގެ އުތުރު ބޯޑަރާ ނުވަ ކިލޯމީޓަރު ދުރުން ސީރިއާގެ އަލް ޒަރާހް އަވަށް ކައިރީގަ އެވެ. ހާދިސާގައި އެކަކު މަރުވެ، ބަޔަކަށް އަނިޔާވި އެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސް ޖަމިއްޔާއިން ބުނީ އެ ތަނުން ގިނަ އަދަދެއްގެ މަސްތުވާތަކެތި ފެނުނު ކަމަށާއި އޭގެ ތެރޭގައި ތިން މިލިއަން ކެޕްޓެގަން ގުޅަ އާއި ދެ ޓަނުގެ ކެނެބިސް ހިމެނޭ ކަމަށެވެ.
ލުބްނާންގެ ހިޒްބުﷲ ޖަމާއަތުގެ އިސްނެގުމަށް އިރާނުގެ އަސްކަރީ ގްރޫޕްތަކާ ގުޅިގެން ސީރިއާއަށް ގިނަ އަދަދެއްގެ މަސްތުވާތަކެތި ފޮނުވަން މަސައްކަތް ކުރާ ކަމަށް ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ތުހުމަތު ކުރެ އެވެ.
ހަނގުރާމައިގެ ސަބަބުން ސުންނާފަތިވެފައިވާ ސީރިއާގައި "ނާކޯ ސްޓޭޓް" ނުވަތަ މަސްތުވާތަކެތީގެ ދައުލަތެއް އުފެދެމުންދާ ކަމަށް މިޑްލް އީސްޓް އިންސްޓިޓިއުޓުން ވެސް ބުނެފައިވެ އެވެ.
ސީރިއާގެ ބައެއް ހިސާބުތަކުގައި މަސްތުވާތަކެތި އުފައްދާ ބޮޑެތި ފެކްޓްރީތައް ހިންގަމުންދާ ކަމަށް ތުހުމަތު ކުރެވެ އެވެ. އެ ތަކެތި ގިނައިން ސަޕްލައި ކުރަނީ ސައުދީ އަރަބިއްޔާ އާއި ގަލްފް ގައުމުތަކަށެވެ.
