އިނގިރޭސިވިލާތުގެ ރާނީ އެލިޒަބަތު ދެ ވަނައިގެ ސަންދޯއް ބަލްމޯރަލް ކާސްލްއިން ފެށިގެން ހަ ގަޑިއިރުގެ ދަތުރަކަށް ފަހު އެޑިންބަރާއަށް ގެންގޮސްފި އެވެ.
ބަލްމޯރަލް ކާސްލްއިން ފެށިގެން އެޑިންބަރާގެ ޕެލެސް އޮފް ހޮލީރުޑްހައުސްއާ ހަމައަށް ކާރުކޮޅު ދަތުރު ކުރިއިރު، ގިނަ ބަޔަކު މަގުގެ ދެ ފަރާތަށް ޖަމާވި އެވެ.
އާދީއްތަ ދުވަހުގެ ރޭ ސަންދޯއް އޮންނާނީ ހޮލީރުޑްހައުސް ގަނޑުވަރުގަ އެވެ. ހޯމަ ދުވަހު ސަންދޯއް ގެންދާނީ އެޑިންބަރާގެ ސެއިންޓް ގައިލްސަސް ކެތީޑްރަލް އަށެވެ.
ހޯމަ ދުވަހުގެ އެ ހަފްލާގައި ރާނީގެ ދޮށީ ދަރިކަލުން، އާ ރަސްގެފާނު ޗާލްސް ތިން ވަނަ އާއި ޝާހީ އާއިލާގެ އެހެން ބޭފުޅުން ބައިވެރިވެވަޑައިގަންނަވާނެ އެވެ.
އޭގެ ފަހުން ސަންދޯއް ގެންދާނީ ލަންޑަނަށެވެ. ބަކިންހަމް ޕެލެސްއިން ބުނެފައި ވަނީ ރާނީގެ ޖަނާޒާ އޮންނާނީ ސެޕްޓެމްބަރު 19 ވާ ހޯމަ ދުވަހު ކަމަށެވެ.
އިނގިރޭސިވިލާތުގެ ތަހުތުގައި 70 އަހަރު ހޭދަކުރެއްވި ރާނީ އަވަހާރަވީ އުމުރުފުޅުން 96 އަހަރުގައި މިދިޔަ ބުރާސްފަތި ދުވަހު އެވެ.
