އިނގިރޭސިވިލާތުގެ ކުރީގެ ރާނީ އެލިޒަބަތު ދެ ވަނައިގެ ޖަނާޒާ އޮންނާނީ ސެޕްޓެމްބަރު 19 ގައި ކަމަށް އިއުލާންކޮށްފި އެވެ.
ރާނީ އަވަހާރަވީ ބަލްމޯރަލް ޕެލެސްގަ އެވެ. އެ ތަނުން އާދީއްތަ ދުވަހު އެކަމަނާގެ ހަށިކޮޅު ސަންދޯކެއްގައި ގެންދާނީ އެޑިންބަރާގެ ޕެލެސް އޮފް ހޯލީރުޑް ހައުސް އަަށެވެ.
ހޯމަ ދުވަހު ސަންދޯއް ގެންދާނީ އެޑިންބަރާގެ ސެއިންޓް ގައިލްސް ކެތީޑްރަލް އަށެވެ. ޝާހީ އާއިލާގެ މެމްބަރުންނާ އެކު އެ ތަނުގައި ކުޑަ ޖަނާޒާއެއް އޮންނާނެ އެވެ.
އެ ތަނުގައި ސަންދޯއް އޮންނަ 24 ގަޑިއިރު އާއްމުންނަށް ވަދެވޭނެ އެވެ. އަންގާރަ ދުވަހު ރާނީގެ ދަރިކަނބަލުން އަމީރާ އޭން, މަންމާފުޅުގެ ހަށިކޮޅު ލަންޑަން ގެންދަވާނެ އެވެ.
ސަންދޯއް ގެންދާނީ އެޑިންބަރާ އެއާޕޯޓުން ބަކިންހަމް ޕެލެސް އަށެވެ. އެއަށްފަހު ބުދަ ދުވަހު ސަންދޯއް ގެންދާނީ ވެސްޓްމިންސްޓާ ހޯލް އަށެވެ.
ބުރާސްފަތި ދުވަހުން ފެށިގެން ރާނީގެ ހަށިކޮޅު ހަތަރު ދުވަސް ވަންދެން އޮންނާނީ އެ ތަނުގަ އެވެ. އެ ދުވަސްތަކުގައި އާއްމުންނަށް ސަންދޯއް ދައްކާލާނެ އެވެ.
ރަސްމީ ޖަނާޒާ ތާވަލުކޮށްފައި ވަނީ ސެޕްޓެމްބަރު 19 ވާ ހޯމަ ދުވަހު އިނގިރޭސިވިލާތުގެ ގަޑިން ހެނދުނު 11:00 އަަށެވެ.
ރާނީގެ ހަށިކޮޅު ފަސްދާނުލާނީ ވިންޑްސާގައި ހުންނަަ ރަސްގެފާނު ޖޯޖް ހަ ވަނަ މެމޯރިއަލް ޗޭޕަލްގަ އެވެ. ޖަނާޒާގެ ކުރިން އާ ރަސްގެފާނު ޗާލްސް ތިން ވަނަ ދަތުރުފުޅުތަކެއް ކުރައްވާނެ އެވެ. އެގޮތުން ރަސްގެފާނު ވަޑައިގަންނަވާނީ ސްކޮޓްލޭންޑް، އުތުރު އަޔަލޭންޑް އަދި ވޭލްސް އަށެވެ.
