މަންމާފުޅުގެ ނަމޫނާގައި ހިފައިގެން ކުރިއަށް ވަޑައިގަންނަވާނެ ކަމަށް އިނގިރޭސިވިލާތުގެ އާ ރަސްގެފާނު ޗާލްސް ތިން ވަނަ ވިދާޅުވެއްޖެ އެވެ.
އިނގިރޭސިވިލާތުގެ ކުރީގެ ރާނީ އެލިޒަބަތު ދެ ވަނަ އުމުރުފުޅުން 96 އަހަރުގައި އަވަހާރަވީ މިދިޔަ ބުރާސްފަތު ދުވަހު އެވެ. އެކަމަނާ ތަހުތުގައި 70 އަހަރު ހޭދަކުރެއްވި އެވެ.
އެކަމަނާ އަވަހާރަވި ވަގުތުން ފެށިގެން ދޮށީ ދަރިކަލުން ޗާލްސްއަކީ އިނގިރޭސިވިލާތުގެ އާ ރަސްގެފާނެވެ. އެމަނިކުފާނު ރަަސްމީކޮށް ތަހުތާ ހަވާލުވެވަޑައިގަތުން އޮތީ ހޮނިހިރު ދުވަހު އެވެ.
ސެއިންޓް ޖޭމްސަސް ޕެލެސްގައި އޮތް ރަސްމިއްޔާތުގައި ރަސްގެފާނު ޗާލްސް ވިދާޅުވީ މަންމާފުޅުގެ ރަނިކަމާއި އެހެން އެއްވެސް ވެރިޔަކާ ނުބައްދަލު ކަމަށެވެ.
"އަޅުގަނޑުގެ މަންމާފުޅުގެ ރަނިކަމުގެ މުއްދަތާއި ގުރުބާނީތަކާއި އެހެން އެއްވެސް ވެރިޔަކާ ނުބައްދަލު. މިއަދު ހިތާމަކުރާ ހާލު ވެސް އެކަމަނާއަށް ޝުކުރު ކުރަން،" ރަސްގެފާނު ވިދާޅުވި އެވެ.
އިނގިރޭސިވިލާތުގައި އާ ރާނީ ނުވަތަ ރަސްގެފާނާ ތަހުތު ހަވާލުކުރައްވަނީ އެކްސެޝަން ކައުންސިލުންނެވެ. މިއީ އެ ކައުންސިލްގެ ރަސްމިއްޔާތު ޓީވީއިން ވަގުތުން ދެއްކި ފުރަތަމަ ފަހަރެވެ.
