އިރުމަތީ ޔޫކްރެއިންގެ ސަރަހައްދުތައް އަނބުރާ ހޯދަން އެ ގައުމުގެ ފައުޖުން ހިންގާ އޮޕަރޭޝަނާ ގުޅިގެން ރަޝިއާގެ ސިފައިން ބައެއް މުހިއްމު އަވަށްތައް ދޫކޮށް ހިނގައްޖެ އެވެ.
ޔޫކްރެއިންގެ އޮފިޝަލުން ބުނީ ރަޝިއާގެ ފައުޖަށް ތަކެތި ސަޕްލައި ކުރަން މުހިއްމު މަަރުކަޒެއްގެ ގޮތުގައި ބޭނުން ކުރާ ކުޕިއާންސްކް އަވަށަށް ޔޫކްރެއިން ސިފައިން ހޮނިހިރު ދުވަހު ވަދެފައިވާ ކަމަށެވެ.
ރަޝިއާގެ ޑިފެންސް މިނިސްޓްރީން ބުނީ އެ ސަރަހައްދުގައި އޮންނަ އިޒިޔަމް އަވަށުން އެ ގައުމުގެ ސިފައިން ފައިބާފައިވާ ކަމަށާއި މަސައްކަތް ކުރަނީ "ރީގްރޫޕްވުމަށް" ކަމަށެވެ.
އޭގެ އިތުރުން ބަލަކްލިޔާ އަވަށުން ވެސް ރަޝިއާ ސިފައިން ފައިބާފައިވާ ކަމަށް އެ ގައުމުގެ ޑިފެންސް މިނިސްޓްރީން ބުންޏެވެ. އެ މިނިސްޓްރީން ބުނީ ޑޮނެސްކްގައި ސިފައިން އިތުރު ކުރަމުންދާ ކަމަށެވެ.
ޔޫކްރެއިނަށް އެ އަވަށްތަކުގެ ކޮންޓްރޯލް ދެމެހެއްޓިއްޖެ ނަމަ އެކަން ވާނީ މިދިޔަ އެޕްރީލް މަހު ވެރިރަށް ކިޔެވް ވަށައިގެންވާ ހިސާބުތަކުން ރަޝިއާ ސިފައިން ފޮނުވާލި ފަހުން، ހޯދި އެންމެ ބޮޑު ކުރިއެރުމަށެވެ.
