މިދިޔަ ބުރާސްފަތި ދުވަހު އަވަހާރަވި އިނގިރޭސި ރާނީ އެލިޒަބަތު ދެ ވަނައަކީ ގާތްގަނޑަކަށް މުޅި ދުނިޔެ ދަންނަ ޝަހުސިއްޔަތެކެވެ. އިނގިރޭސިވިލާތާއި ކޮމަންވެލްތުގައި ހިމެނޭ 14 ގައުމެއްގެ ރަނިކަން 70 އަހަރު ވަންދެން އެކަމަނާ ކުރެއްވި އެވެ. ގާނޫނުގެ ކުރިމަތީގައި އެންމެން ހަމަހަމަ ޑިމޮކްރެޓިކް ނިޒާމަކަށް އިނގިރޭސިވިލާތުގައި ވެރިކަން ހިންގި ނަމަވެސް، އެކަމަނާއަށް ހާއްސަ ގޮތްތަކެއް ގެންގުޅުއްވި އެވެ.
ގާޑިއަން ނޫހުން ރިޕޯޓު ކުރި ގޮތުގައި 1967 ވަނަ އަހަރަށް ފަހު 160 އަށް ވުރެ ގިނަ ގާނޫނު އަލުން ޑްރާފްޓް ކުރީ ރާނީ އެލިޒަބަތު ދެ ވަނައިގެ މައްޗަށް އެ ގާނޫނުތައް ނުހިނގާ ގޮތް ހެދުމަށެވެ. އޭގެ ތެރެއިން ބައެއް ގާނޫނުތަކަކީ މާ މުހިއްމު ގާނޫނުތަކަކަށް ނުވިޔަސް، އަނެއް ބައި ގާނޫނުތަކުން އެކަމަނާއަށް ހާއްސަ އިމްތިޔާޒްތަކެއް ލިބެން ޖެހުނު ސަބަބާ މެދު ސުވާލު އުފެދެ އެވެ.
ރިޕޯޓުތައް ބުނާ ގޮތުން ތަފާތު ކުރުން މަނާ ކުރުމުގެ ގާނޫނެއް ރާނީ އާއި އިނގިރޭސި ޝާހީ އާއިލާގެ މައްޗަށް ނުހިނގަ އެވެ. އެހެންކަމުން ރާނީގެ އެއްވެސް މުވައްޒަފަކަށް ނަސްލީ އަދި ޖިންސީ ތަފާތު ކުރުމުގެ މައްސަލަ ނަގައި ޝަކުވާ ހުށަނޭޅޭނެ އެވެ. އޭގެ ބަދަލުގައި އެފަދަ މައްސަލަތައް ބެލުމަށް ޝާހީ ގަނޑުވަރުގެ ތެރެއިން ވަކި އުސޫލެއް ގެންގުޅޭ ކަމަށްވެ އެވެ.
އޭގެ އިތުރުން އެއްވެސް ޖިނާއީ އަދި މަދަނީ މައްސަލައެއްގައި ރާނީއާ ދެކޮޅަށް ދައުވާ ނުއުފުލޭނެ ކަމަށް ކަނޑައަޅާފައިވެ އެވެ. ދައުލަތުގެ އެންމެ މަތީ ވެރިޔާގެ ހައިސިއްޔަތުން އެކަމަނާއަށް ގާނޫނީ ރައްކާތެރިކަން ލިބިދިނެވެ. އެހެން ނަމަވެސް، ޝާހީ އާއިލާގެ އެހެން މެމްބަރުންނަށް އެ ރައްކާތެރިކަމެއް ނޯވެ އެވެ.
ބަަކިންހަމް ޕެލެސް އާއި ޝާހީ މުދާތަކުގެ ކުރީގެ ވެރިޔާއަކީ ރާނީ އެލިޒަބަަތު ދެ ވަނަ އެވެ. އެހެން ނަމަވެސް، ވަކި ފަރުދެއްގެ ގޮތުން އެކަމަނާގެ ގާނޫނީ ޝަހުސަކީ އެލިޒަބަަތު ވިންޑްސާ އެވެ. ރާނީ އެލިޒަބަތު ޝާހީ މުދާ ވިއްކުމުގެ ކަންކަން ކުރެއްވުން ގާނޫނުން މަނާ އެވެ. އެކަމަކު އެލިޒަބަތު ވިންޑްސާގެ ހައިސިއްޔަތުން، އެހެން ފަރުދުންނާ އެއް ގޮތަށް މުދާ ގަނެ ވިއްކުމުގެ ހައްގު އޮތެވެ.
ރާނީ އެލިޒަބަތު ދެ ވަނަ ގިނަ ތަންތަނަށް ދަތުރު ކުރެއްވީ ޑްރައިވަރެއްގެ އެހީގަ އެވެ. އެކަމަަކު އަމިއްލަފުޅު އުޅަނދެއް ދުއްވަން ޖެހިއްޖެ ހާލަތެއްގައި އެކަމަނާއަށް ޑްރައިވިން ލައިސެންސް ބޭނުމެއް ނުވެ އެވެ. އޭގެ އިތުރުން ގައުމުން ބޭރަަށް ކުރައްވާ ދަަތުރުފުޅުތަކުގައި ވެސް އެކަމަނާގެ ޕާސްޕޯޓެއް ނޯވެ އެވެ.
ޝާހީ އާއިލާގެ ވެބްސައިޓުގައިވާ ގޮތުން އިނގިރޭސި ޕާސްޕޯޓް ދޫކުރަނީ އޭރެއްގައި ހުންނަ ރާނީ ނުވަތަ ރަސްގެފާނުގެ ނަންފުޅުގަ އެވެ. އެހެންވީމާ، އޭރެއްގައި ހުންނަ ވެރިޔަކަށް ޕާސްޕޯޓު ބޭނުމެއް ނުވާނެ އެވެ.
އޭގެ އިތުރުން މައުލޫމާތު ހޯދާ ލިބިގަތުމުގެ ގާނޫނުގެ ދަށުން އާއްމުން މައުލޫމާތު ހޯދަން އެދުނު ނަމަވެސް، ވެރިޔަަކަށް ހުންނަ ފަރާތުން އެ މައުލޫމާތު ހިއްސާާ ކުރުން މަޖުބޫރެއް ނޫނެވެ. ރާނީއަށް ކުރިން ލިބިދިން އެ ހުރިހާ ގާނޫނީ އިމްތިޔާޒްތަކެއް ދެން ލިބިވަޑައިގަންނަވާނީ ދޮށީ ދަރިކަލުން އާ ރަސްގެފާނު ޗާލްސް ތިން ވަނަ އަށެވެ.
