އިނގިރޭސިވިލާތުގެ އާ ރަސްގެފާނު ޗާލްސް ތިން ވަނަ ގައުމާ މުހާތަބު ކުރައްވައި ދެއްވި ފުރަތަމަ ހިތާބުގައި މަންމާފުޅު ރާނީ އެލިޒަބަތު ދެ ވަނަައަަށް ޝުކުރު ދަންނަވައިފި އެވެ.
އިނގިރޭސި ތަހުތުގައި 70 އަހަރު ހޭދަކުރެއްވި ރާނީ އެލިޒަބަތު އަވަހާރަވީ އުމުރުފުޅުން 96 އަހަރުގައި ބުރާސްފަތި ދުވަހު އެވެ. އާ ރަސްގެފާނު، އުމުރުފުޅުން 73 އަހަރުގެ ޗާލްސްއަކީ އެކަމަނާގެ ދޮށީ ދަރިކަލުންނެވެ.
ރަސްގެފާނު ޗާލްސްގެ ފުރަތަމަ ހިތާބުގައި ވިދާޅުވީ މަންމާފުޅު ވަނީ އާއިލާ އާއި މުޅި ގައުމަށް ވެސް ގިނަގުނަ ހިދުމަތްތަކެއް ކުރައްވާފައި ކަމަށާއި އެކަމަށްޓަކައި އެކަމަނާއަށް ޝުކުރު ދަންނަވާ ކަމަށެވެ.
"އާއިލާއަކުން މަންމައަކަށް އަދާކުރަން ޖެހޭ އެންމެ ބޮޑު ދަރަނި އަޅުގަނޑުމެންގެ ބޮލުގައި ވަނީ އެޅިފައި. އެކަމަނާގެ ލޯތްބާއި، ކުލުނާއި، އިރުޝާދާއި، ވިސްނުންތެރިކަމާއި، ނަމޫނާއަކީ އަގުހުރި މިސާލެއް،" ރަސްގެފާނު ޗާލްސް ވިދާޅުވި އެވެ.
ރަސްގެފާނު ޗާލްސް ވިދާޅުވީ އެމަނިކުފާނުގެ ހަޔާތުގެ ބާކީ ބައި ހޭދަކުރައްވާނީ އިނގިރޭސިވިލާތުގެ ގާނޫނު އަސާސީ ނަގަހައްޓަައި ގައުމުގެ ހިދުމަތުގައި ކުރިއަށް ދިޔުމަށް ކަމަށެވެ.
އޭގެ އިތުރުން އަނބިކަނބަލުން ކެމިލާއަކީ ފާއިތުވި 17 އަހަރު ގައުމުގެ ހިދުމަތުގައި ކުރެއްވި މަސައްކަަތް، ކުއީން ކޮންސޯޓުގެ ގޮތުގައި ކުރިއަށް ގެންދަވާނެ ކަމަށް ރަަސްގެފާނު ވިދާޅުވި އެވެ.
ދަރިކަލުން އަމީރު ވިލިއަމްއަކީ މިހާރު އާ ވަލީ އަހުދު ކަމަށާއި ވިލިއަމް އާއި އަނބިކަނބަލުން ކޭޓްގެ ހިދުމަތް ވެސް ގައުމަށް ލިބިވަޑައިގަންނަވާނެ ކަމަށް ވިދާޅުވި އެވެ.
ރަސްގެފާނުގެ ހިތާބުގައި ވިދާޅުވީ ރާނީ އެލިޒަބަތު ފަސްދާނުލާނީ މީގެ ހަފުތާއެއްހާ ދުވަސް ފަހުން ކަމަށެވެ. އެކަމަށް ވަކި ދުވަހެއް ކަނޑަނޭޅި ނަމަވެސް، ޝާހީ ޕްރޮޓޮކޯލްގައިވާ ގޮތުން ފަސްދާނުލުން އޮންނާނީ އަވަހާރަވާތާ 10 ދުވަސް ފަހުންނެވެ.
