މެލޭރިއާއިން ރައްކާތެރިވުމަށް އިނގިރޭސިވިލާތުގެ އޮކްސްފޯޑް ޔުނިވާސިޓީގައި އުފެއްދި އާ ވެކްސިނާ އެކު ބޮޑު އިންގިލާބެއް އަަންނާނެ ކަމަށް ސައިންސްވެރިން ބުނެފި އެވެ.
މިހާތަނަށް ހެދި ދިރާސާތަކުން ދައްކާ ގޮތުގައި އެ ވެކްސިނުން މެލޭރިއާއާ ދެކޮޅަށް 80 ޕަސެންޓް ރައްކާތެރިކަން ލިބެ އެވެ. ސައިންސްވެރިން އުއްމީދު ކުރަނީ އެ ވެކްސިން އަންނަ އަހަރު ދޭން ފެށުމަށެވެ.
އެއީ އަަގުހެޔޮކޮށް އުފެއްދޭ ވެކްސިނަކަށް ވާއިރު، މިހާރު ވެސް އަހަރަކު 100 މިލިއަނަށް ވުރެ ގިނަ ޑޯޒް އުފެއްދުމުގެ އެއްބަސްވުމަކަށް ވަނީ ގޮސްފަ އެވެ.
ހިލޭ ސާބަހަށް މަސައްކަަތް ކުރާ މެލޭރިއާ ނޯ މޯ ޖަމިއްޔާއިން ބުނީ އެ ވެކްސިންގެ ސަބަބުން މެލޭރިއާ ޖެހިގެން ކުޑަކުދިން މަރުވުން ހުއްޓުވިދާނެ ކަމަށެވެ.
މަދިރީގެ ޒަަރިއްޔާއިން ފެތުރޭ މެލޭރިއާއާ ދެކޮޅަށް ރަނގަަޅު ވެކްސިނެއް އުފައްދަން ސައިންސްވެރިން ވަނީ ގަރުނަކަށް ވުރެ ގިނަ ދުވަސް މަސައްކަަތްކޮށްފަަ އެވެ.
މެލޭރިއާއާ ދެކޮޅަށް އުފެއްދި ފުރަތަމަ ވެކްސިނަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހުއްދަ ދިނީ މިދިޔަ އަހަަރު އެވެ. ޖީއެސްކޭގެ އެ ވެކްސިން އެފްރިކާ ގައުމުތަކުގައި ދަނީ ދެމުންނެވެ.
އެހެން ނަމަވެސް، އޮކްސްފޯޑް ޔުނިވާސިޓީގެ ސައިންސްވެރިން ބުނީ އެ މީހުން އުފެއްދި ވެކްސިން މާާ އިފެކްޓިވް އަދި އަގުހެޔޮ ކަމަށެވެ.
މިހާތަނަށް ހެދި ދިރާސާއިން ދައްކާ ގޮތުގައި ވެކްސިންގެ ތިން ޑޯޒް ދިނުމަށް ފަހު، އަހަރެއް ފަހުން ބޫސްޓާ ޑޯޒެއް ޖެހުމުން 80 ޕަސެންޓް ރައްކާތެރިކަން ލިބެ އެވެ.
އެ ވެކްސިނަށް ހުއްދަ ހޯދަން ހުށަހެޅުމުގެ މަސައްކަަތް ކުރަމުންދާ އިރު، އިތުރު 4،800 ކުދިން ބައިވެރި ކުރި ބޮޑު ދިރާސާއެއްގެ ނަތީޖާ މި އަހަރު ފަހުކޮޅު ލިބޭނެ އެވެ.
ތުއްތު ކުދިންނާއި ކުޑަަކުދިންގެ ފުރާނައަށް ނުރައްކާވާ މެލޭރިއާ ޖެހިގެން އަހަރަކު 400،000 އަށް ވުރެ ގިނަ މީހުން މަރުވެ އެވެ.
