ކްރައިމިއާއަަށް މިދިޔަ މަހު ދިން ވައިގެ ހަމަލާތަކުގެ ޒިންމާ ޔޫކްރެއިނުން އުފުލައިފި އެވެ.
އޯގަސްޓް މަހުގެ ކުރީކޮޅު ދިން ހަމަލާއެއްގައި ރަޝިއާގެ ސާކީ އަސްކަރީ މަރުކަޒުން އެކަކު މަރުވި އެވެ.
އެ ހަމަލާތަކުގައި އެއްވެސް ދައުރެއް އަދާ ނުކުރާ ކަމަށް ޔޫކްރެއިނުން މީގެ ކުރިން ތަކުރާރުކޮށް ބުންޏެވެ.
އެހެން ނަމަވެސް ޔޫކްރެއިންގެ އިސް ކޮމާންޑަރު ވެލެރީ ޒަލުޒްނިޔީ ބުދަ ދުވަހު ވިދާޅުވީ ކްރައިމިއާގެ އަސްކަރީ ސައިޓުތަކަށް ޔޫކްރެއިންގެ ރޮކެޓު ފޮނުވި ކަމަށެވެ.
އޭނާ ވިދާޅުވީ ޔޫކްރެއިންއާ ދެކޮޅަށް ހަމަލާތައް ދޭން ރަޝިއާއިން ބޭނުން ކުރާ އަސްކަރީ މަރުކަޒަކަށް ދިން ހަމަލާއެއްގައި ރަޝިއާގެ 10 ހަނގުރާމަ މަތީ ޖެޓު ހަލާކުވި ކަމަށެވެ.
ރަަޝިއާގެ އަސްކަރީ ގާބިލްކަން ދަށްކުރުމުގެ އިތުރުން، ކްރައިމިއާއަށް ހަމަލާ ދިނީ ރަޝިއާ ސިފައިންގެ އިތުބާރު ގެއްލުވާލައި ނަފްސާނީ ގޮތުން ބަލިކަށިކޮށްލުމަށް ކަމަށް އޭނާ ވިދާޅުވި އެވެ.
އޯގަސްޓް މަހުގެ ހަމަލާތަކުގެ ކުރިން، ކްރައިމިއާގައި އެއްވެސް ވަރަކަށް ހަނގުރާމައިގެ ނިޝާނެއް ނެތެވެ. އެ ތަނުގެ ގޮނޑުދޮށްތަކުގައި ރަޝިއާގެ ފަތުރުވެރިން ވެސް މިނިވަންކަމާ އެކު އުޅެމުން ދިޔަ އެވެ.
ހަމަލާ ދިން ސާކީ އަސްކަރީ މަރުކަޒަކީ ގޮނޑުދޮށާ ކައިރީގައި ހުންނަ ތަނެކެވެ. އެ ތަނަށް ހަމަލާ ދިން ދުވަހު ފަތުރުވެރިން ބިރުން ދުވާ މަންޒަރުގެ ވީޑިއޯތައް އާއްމުވި އެވެ.
ޔޫކްރެއިންގެ ބިމެއްގެ ގޮތުގައި އޮތް ކްރައިމިއާ ރަޝިއާގެ ބާރުގެ ދަށަށް ދިޔައީ 2014 ގަ އެވެ.
