ދެކުނު އޭޝިއާގެ ފުޓްބޯޅަ އެސޯސިއޭޝަން (ސާފް) އިން މިހާރު ކުރިއަށްގެންދާ 17 އަހަރުން ދަށުގެ ފިރިހެން ފުޓްބޯޅަ މުބާރާތާއި ވިމެންސް ޗެމްޕިއަންޝިޕްގެ ފުރަތަމަ މެޗުން ރާއްޖެ ބަލިވެއްޖެ އެވެ.
ސްރީ ލަންކާގައި ކުރިއަށްދާ 17 އަހަރުން ދަށުގެ މުބާރާތުގައި ރާއްޖޭން ކުޅުނު ފުރަތަމަ މެޗުން މިއަދު ވަނީ 5-0 އިން ބަންގްލަދޭޝް އަތުން ބަލިވެފަ އެވެ. އަދި ނޭޕާލްގައި ކުޅޭ ސާފް ވިމެންސް ޗެމްޕިއަންޝިޕްގައި ކުޅުނު ފުރަތަމަ މެޗުން މިއަދު ރާއްޖެ ބަލިވީ ބަންގްލަދޭޝާ ވާދަކޮށް 3-0 އިންނެވެ.
ކޮލަމްބޯގެ ރޭސްކޯސް ސްޓޭޑިއަމްގައި ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގައި މިއަދު ކުޅުނު މެޗުގައި ބަންގްލަދޭޝް ޓީމުން ފުރަތަމަ ހާފުގައި ދެ ގޯލުގެ ލީޑެއްނެގި އެވެ. ފުރަތަމަ ގޯލު ޖެހީ ހަތަރު ވަނަ މިނިޓްގައި ނަޒްމުލް ފައިސަލް އެވެ. ފުރަތަމަ ހާފު ނިމުމުގެ ކުރިން މެޗުގެ 38 ވަނަ މިނިޓްގައި މުރްޝަދު އަލީ ވަނީ ބަންގްލަދޭޝްގެ ލީޑުފުޅާކޮށްދީފަ އެވެ.
ބަންގްލަދޭޝާ ދެކޮޅަށް ނުކުތް ރާއްޖޭގެ 17 އަހަރުން ދަށުގެ ޓީމު.
މެޗުގެ ފަހު 15 މިނިޓް ތެރޭ ބަންގްލަދޭޝްގެ އަނެއް ތިން ގޯލު ޖަހައި، އެ ޓީމުގެ މިރާޖުލް އިސްލާމް ވަނީ ހެޓްރިކެއް ހަދައިފަ އެވެ.
ދެން އޮތް މެޗުގައި ރާއްޖޭން ކުޅެން ޖެހޭނީ ހުކުރު ދުވަހު ލަންކާއާ ދެކޮޅަށެވެ. އެ މެޗުން މޮޅުވެގެން ރާއްޖެ އަށް ސެމީ ފައިނަލަށް ދެވޭނެ އެވެ. ލަންކާ ވަނީ ފުރަތަމަ މެޗުގައި ބަންގްލަދޭޝް އަތުން 5-1 އިން ބަލިވެފަ އެވެ.
ސަތާރަ އަހަރުން ދަށުގެ ޓީމު ކުޅެނީ އިސްމާއިލް އާސިފް (ކުޑަހީނާ)ގެ ކޯޗުކަމުގަ އެވެ.
ބަންގްލަދޭޝް މެޗަށް ފަހު މިއަދު އޮތް ނޫސްވެރިންގެ ބައްދަލުވުމުގައި ރާއްޖޭގެ ކޯޗިން ޓީމުގައި ހިމެނޭ އިލްމާއު ހުސެއިން (މައު) ބުނީ ރާއްޖެ އަށް ލަންކާ ބަލިކޮށްގެން ނޫން ގޮތަކަށް ސެމީ ފައިނަލަށް ދެވެން ނެތުމުން އެ މެޗު ނަގާނީ ފައިނަލެއްގެ ގޮތުގައި ކަމަށެވެ.
ބަންގްލަދޭޝާ ދެކޮޅަށް މިއަދު ރާއްޖޭން ނެރުނު ފުރަތަމަ އެގާރަ.--- ފޮޓޯ: ގޯލްނޭޕާލް
ނޭޕާލުގެ ދަސްރަތު ސްޓޭޑިއަމްގައި ރާއްޖޭގެ އަންހެން ޓީމާ ދެކޮޅަށް ބަންގްލަދޭޝް އިން ކުޅުނު މެޗުގެ ތިން ގޯލު ވެސް ފެނިގެންދިޔައީ މެޗުގެ ފުރަތަމަ ހާފުގަ އެވެ. އެ ގޮތުން މެޗުގެ 32 ވަނަ މިނިޓްގައި ބަންގްލަދޭޝަށް ލީޑުނަގައިދިނީ ކެޕްޓަން ސަބީނާ ހަތުންނެވެ. އޭނާ ވަނީ މީގެ ކުރިން ރާއްޖޭގެ އެކި މުބާރާތްތަކުގައި ވެސް ކުޅެފަ އެވެ. އެންމެ ފަހުން ކުޅުނީ މިދިޔަ އަހަރުގެ ކްލަބް މޯލްޑިވްސް ކަޕްގައި ދިވެހި ސިފައިންގެ ކްލަބް އަށެވެ.
ލީޑުނެގިތާ ދެ މިނިޓް ފަހުން، ބަންގްލަދޭޝް އަށް ދެ ވަނަ ލަނޑު ޖަހައިދިނީ މަސޫރާ ޕަރްވިން އެވެ. އަދި ފުރަތަމަ ހާފު ނިމުމުގެ ކުރިން ސަބީނާ ވަނީ އިތުރު ގޯލެއް ޖަހައިފަ އެވެ.
ކޯޗު އަހުމަދު ޝަރީފް (ޑުންގާ)ގެ އިރުޝާދުގެ ދަށުން ރާއްޖޭގެ އަންހެން ޓީމު ކުޅެމުން އަންނައިރު، ދެން ރާއްޖެ އަށް އޮތީ މުބާރާތުގެ ޗެމްޕިއަންކަން ފަސް ފަހަރު ހޯދާފައިވާ އިންޑިއާއާ ދެކޮޅަށް ކުޅޭ މެޗާއި ސަސްޕެންޝަނަށް ފަހު އެނބުރި އައިސް ވާދަކުރާ ޕާކިސްތާނާ ކުޅޭ މެޗެވެ.
ފުރަތަމަ މެޗަށް ފަހު އޮތް ނޫސްވެރިންގެ ބައްދަލުވުމުގައި ޑުންގާ ބުނީ ފުރަތަމަ މެޗުގެ އަލީގައި ރަނގަޅު ކުރަން ހުރި ކަންތައްތަކަށް ފޯކަސްކޮށް ދެން އޮތް ދެ މެޗަށް ރަނގަޅަށް ތައްޔާރުވާނެ ކަމަށެވެ.
މި ގްރޫޕްގެ ފުރަަތަމަ މެޗުގައި އެންމެ ފަހުގެ ޗެމްޕިއަން، އިންޑިއާ އިން ވަނީ 3-0 އިން ޕާކިސްތާން ބަލިކޮށްފަ އެވެ.
