ޒަޕޮރިއްޒިޒިއާ ނިޔުކްލިއާ ޕްލާންޓް ވަށައި އދ. އިން ހުށަހެޅި ގޮތަށް ރައްކާތެރި ޒޯނެއް ހަދަން ތާއީދު ކުރާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ޔޫކްރެއިން ހަނގުރާމަ ފެށުމާ އެކު މިދިޔަ މާޗް މަހުން ފެށިގެން އެ ޕްލާންޓް ކޮންޓްރޯލް ކުރަނީ ރަޝިއާއިންނެވެ. ޕްލާންޓަށް ގިނަ ހަމަލާތަކެއް ދީފައިވާ އިރު، ޔޫކްރެއިނާއި ރަޝިއާއިން ތުހުމަތު ކުރަނީ އެއް ގައުމު އަނެއް ގަައުމަށެވެ.
އދ. އިން ބުނީ ޔޫރަޕްގެ އެންމެ ބޮޑު ނިޔުކްލިއާ ޕްލާންޓަށް ހަމަލާ ދިނުން ވަގުތުން ހުއްޓާލަން ޖެހޭ ކަމަށެވެ. ހަމަލާދޭ ނަމަ ރޭޑިއޯއެކްޓިވް ލީކެއް ހިނގުމުގެ ފުރުސަތު އެބަ އޮތެވެ.
އަދި އެ ޕްލާންޓުގައި މިހާރު މަސައްކަތް ކުރަމުންދާާ ޔޫކްރެއިންގެ 907 މީހުންނަށް ބޮޑު ޕްރެޝަރަކާ ކުރިމަތިވެފައިވާ ކަމަށް ވެސް އެ ރިޕޯޓުގައިވެ އެވެ.
އދ. ގެ ގޮވާލުމަށް ތާއީދު އޮތް ކަން ހާމަކުރައްވަމުން ޒެލެންސްކީ ވިދާޅުވީ ނިޔުކްލިއާ ޕްލާންޓް ވަށައި ހަތިޔާރު ގެންގުޅުން މަނާ ޒޯނެއް ހަދަން ޖެހޭ ކަމަށެވެ.
މިދިޔަ ހަފްތާގައި އދ. ގެ ނިޔުކްލިއާ އެޖެންސީގެ ޓީމެއް އެ ޕްލާންޓަށް ކުރި ދަތުރަށް ފަހު ނެރުނު ރިޕޯޓުގައި ބުނީ ޕްލާންޓްގައި ރަޝިއާގެ އަސްކަރީ ސާމާނު ހުރުމުން އެ ތަނުގެ ސެކިއުރިޓީއާ މެދު ސުވާލު އުފެދޭ ކަމަށެވެ.
އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގެ 14 މެމްބަރުންގެ ޓީމު އެ ޕްލާންޓުގައި ތިބި ވަގުތު ވެސް ހަމަލާތައް ދިނެވެ. ދެ ދުވަސް ފަހުން އައިއޭއީއޭގެ ޓީމުގެ ގިނަ މެމްބަރުން އެނބުރި ދިޔަ ނަމަވެސް، އެ ޓީމުގެ ދެ މެމްބަރުން އަދިވެސް ތިބީ ޕްލާންޓްގަ އެވެ.
