ޔޫކްރެއިން ހަނގުރާމައާ ގުޅިގެން ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާނުލަނީސް ޔޫރަޕަށް ގޭސް ފޮނުވާ ހޮޅި ނުހުޅުވާނެކަމުގެ އިންޒާރު ރަޝިއާއިން ދީފި އެވެ.
ރަޝިއާ ސަރުކާރުގެ ހަކަތައާ ބެހޭ މައި ކުންފުނި ގޭޒްޕްރޮމްއިން ކުރިން ބުނެފައިވަނީ ތިން ދުވަހުގެ މަރާމާތަށް ފަހު ހޮނިހިރު ދުވަހު ނޯޑް ސްޓްރީމް 1 ގޭސް ހޮޅި ހުޅުވާނެ ކަމަށެވެ.
އެކަަމަކު ފަހުން ބުނީ ހޮޅި އަލުން ހުޅުވޭނެ ތާރީހެއް ނޭނގޭ ކަމަށާއި އެ ނިންމުމުގެ ޒިންމާ އުފުލަން ޖެހޭނީ ހުޅަނގުގެ ގައުމުތަކުން ކަަމަށެވެ.
ދަތިކުރުމުގެ ފިޔަވަޅުތަކަށް ލުއިދީފި ނަމަ ހޮޅި ހުޅުވާނެތޯ ސުވާލު ކުރުމުން ރަޝިއާ ސަރުކާރުގެ ތަރުޖަމާނު ވިދާޅުވީ "ޔަގީން" ކަމަށެވެ.
ގޭސް ޕަމްޕް ކުރުމުގައި މައްސަލަ ޖެހުނީ އަޅުގަނޑުމެންގެ ގައުމާ ދެކޮޅަށް އަޅާފައިވާ ފިޔަވަޅުތަކާ ހެދި. އަދި އަަޅުގަނޑުމެންގެ ބައެއް ކުންފުނިތަކާ ދެކޮޅަށް ޖަަރުމަނާއި އިނގިރޭސިވިލާތް ފަދަ ގައުމުތަކުން އަޅާފައިވާ ފިޔަވަޅުތަކާ ހެދި،" ޑިމިޓްރީ ޕެސްކޯވް ވިދާޅުވި އެވެ.
ހަކަތައިގެ ސަޕްލައިއާ މެދު ސުވާލު އުފެދި، ހޯމަ ދުވަހު ގޭހުގެ އަގު އުފުލުނެވެ.
ޔޫރަޕް ގައުމުތަކުން ތުހުމަތު ކުރަނީ ރަޝިއާގެ ގޭސް ސަޕްލައި ބޭނުން ކޮށްގެން އެ ގައުމުތައް ބްލެކްމެއިލް ކުރަން މަސައްކަތް ކުރަމުންދާ ކަމަށެވެ. ރަޝިއާއިން އެ ތުހުމަތު ދޮގުކުރެ އެވެ.
