މެންޗެސްޓާ (ސެޕްޓެމްބަރު 5) - ކާމިޔާބު ހޯދަން ކުރަން ޖެހޭ މަސައްކަތަށް ބަލާއިރު، މި ވަގުތު މެންޗެސްޓާ ޔުނައިޓެޑް ކުރިއަށްދަނީ ރަނގަޅު ޓްރެކުގައި ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
އަޔަކްސް ދޫކޮށް މި ފަހަރު ޔުނައިޓެޑާ ހަވާލުވެ، ޓެން ހާގް ފުރަތަމަ ކުރަން ޖެހުނީ ހިތި ތަޖުރިބާ އެކެވެ. ފުރަތަމަ ދެ މެޗުން ބްރައިޓަން އާއި ބްރެންޓްފޯޑް އަތުން ބަލިވުމުން ގިނަ ފާޑުކިޔުންތަކެއް އަމާޒުވި ނަމަވެސް އެ ޓީމުން ވަނީ އެންމެ ފަހުން ކުޅުނު ހަތަރު މެޗުން މޮޅުވެފަ އެވެ. އެއީ ލިވަޕޫލާއި ސައުތެމްޓަން، ލެސްޓާ ސިޓީ އަދި އާސެނަލް އެވެ.
ލީގުގެ އެއް ވަނައިގައި އޮތް އާސެނަލް އަތުން ރޭ ޔުނައިޓެޑް މޮޅުވީ 3-1 އިންނެވެ. މި ނަތީޖާއާ އެކު ޔުނައިޓެޑުން ލީގުގައި ޖެހިޖެހިގެން ހަތަރު މެޗުން މޮޅުވިއިރު، މިއީ 2021 ވަނަ އަހަރުގެ އޭޕްރީލްގެ ފަހުން ލީގުގައި ޖެހިޖެހިގެން ހަތަރު މެޗުން ޔުނައިޓެޑް މޮޅުވި ފުރަތަމަ ފަހަރެވެ.
ޓެން ހާގް ބުނީ ޔުނައިޓެޑުން ބޭނުންވާ މަންޒިލަށް ދާނަމަ އަދިވެސް ކުރަން ޖެހޭ މަސައްކަތް ގިނަ ކަމަށެވެ.
"ތަށި ހޯދަން ބޭނުމިއްޔާ އަހަރެމެން މި ތިބި ހިސާބުން ވެސް ހުއްޓައިނުލައި ގިނަ މަސައްކަތްތަކެއް ކުރަންޖެހޭ،" ޓެން ހާގް ބުންޏެވެ. "އަހަންނަށް އެނގޭ ޔުނައިޓެޑްގެ ސަޕޯޓަރުންގެ އުންމީދުތައް ހުރީ މި ކްލަބުން ދަމަހައްޓަމުން އައި ކާމިޔާބީތަކުގެ ލެވަލާ ހަމައިގަކަން. އެކަމަކު، އަހަރެމެންގެ މި ޓީމުގެ މަސައްކަތް މި ފެށުނީ، އަހަރެން ބުނާނީ ކާމިޔާބު ހޯދަން ބޭނުންވާ ޓްރެކުގައޭ އަހަރެމެން މި ކުރިއަށްދަނީ،"
ޔުނައިޓެޑުން އެންމެ ފަހުން ތަށްޓެއް ހޯދީ 2017 ވަނަ އަހަރު އެވެ. އެ ފަހަރު ހޯސޭ މޮރީނިއޯގެ ކޯޗުކަމުގައި ކާމިޔާބުކުރީ ޔޫރޮޕާ ލީގާއި އިނގިރޭސި ލީގު ކަޕް އެވެ. އޭގެ ފަހުން ޔުނައިޓެޑަށް އިރުޝާދުދިން އޮލެ ގުނަ ސޯލްޝެއާ އާއި ރަލްފް ރަންގްނިކަށް އެ ޓީމު ގޮވައިގެން ކާމިޔާބެއް ނުހޯދުނެވެ.
ޓެން ހާގް ރޭގެ މެޗުގައި އާސެނަލާ ދެކޮޅަށް ވެސް ނުކުތީ ފުރަތަމަ އެގާރައިން ކްރިސްޓިއާނޯ ރޮނާލްޑޯ އާއި ހެރީ މެގުއާ އަށް ފުރުސަތު ނުދީ އެވެ. ރޭގެ މެޗުގައި ވެސް އެ ދެ ކުޅުންތެރިން ވަނީ ބަދަލަކަށް ކުޅެން އަރުވައިފަ އެވެ.
ޓެން ހާގް ބުނީ ކޮންމެ ކުޅުންތެރިއަކަށް ވެސް ޓީމަށް އެރުމުގެ ފުރުސަތު އޮންނާނެ ކަމަށާއި މީގެ ތަފާތު ފެންނަން ޖެހޭނީ ޕްރެކްޓިހުގައި ފެންނަ ޓީމު ރޫހުން ކަމަށެވެ.
ޔުނައިޓެޑަކީ މި ފަހަރުގެ ޓްރާންސްފާ މާކެޓްގައި ދެ ވަނަ އަށް އެންމެ ބޮޑު ހަރަދުކުރި ޓީމެވެ. އެ ޓީމުން އެންމެ އަގުބޮޑުކޮށް ގަތް ކުޅުންތެރިޔާ، ބްރެޒިލްގެ ވިންގް، އެންތަނީ ވަނީ ފުރަތަަމަ ފަހަރަށް ޓީމުގެ ޖޯޒީގައި ކުޅުނު މެޗުގައި ރޭ އާސެނަލް ކޮޅަށް ގޯލު ޖަހައިފަ އެވެ.
ޓެން ހާގް ބުނީ އޭނާއާ އެކު އަޔަކްސްގައި މަސައްކަތް ކުރި އެންތަނީގެ ލެވަލް ރަނގަޅަށް އެނގޭ ކަމަށާއި އާސެނަލް ކޮޅަށް ޖެހި ގޯލަކީ ޔުނައިޓެޑާ އެކު އެންތަނީ އަށް ރަނގަޅު ކެރިއަރެއް ކުރިއަށް ގެންދިއުމަށް ބޭނުންވާ ކަހަލަ ފެށުމެއް ކަމަށެވެ.
