ނެޓްފްލިކްސް ޑޮކިޔުމެންޓްރީ "އަވާ ގްރޭޓް ނެޝަނަލް ޕާކްސް" އިން އެންމެ މޮޅު ނެރޭޓަރުގެ ގޮތުގައި އެމެރިކާގެ ކުރީގެ ރައީސް ބަރަކް އޮބާމާއަށް އެމީ އެވޯޑް ލިބިވަޑައިގެންފި އެވެ.
ފަސް ބަޔަށް ބަހާލައިގެން އެ ޑޮކިޔުމެންޓްރީ އުފެއްދީ އޮބާމާ އާއި އަނބިކަނބަލުންގެ މިޝޭލްގެ ޕްރޮޑަކްޝަން ކުންފުނި ހަޔާ ގްރައުންޑުންނެވެ. އެއީ ދުނިޔޭގެ ނެޝަނަލް ޕާކްތަކާ ބެހޭ ޑޮކިޔުމެންޓްރީ އެކެވެ.
އޮބާމާއަށް މީގެ ކުރިން ދެ ގްރެމީ އެވޯޑް ލިބިވަޑައިގެންނެވި އެވެ. އެމަނިކުފާނަކީ އެމީ އެވޯޑް ހާސިލްކުރެއްވި އެމެރިކާގެ ރައީސްކަން ކުރެއްވި ދެ ވަނަ ބޭފުޅާ އެވެ.
އެންމެ މޮޅު ނެރޭޓަރުގެ އެވޯޑަށް ދެން ވާދަކުރީ ޑޭވިޑް އެޓެންބޮރޯ، ލުޕިޓާ ނިޔޮންގޯ އަދި ކަރީމް އަބްދުލް ޖައްބާރް އެވެ.
ރަައީސްކަމުގެ ދެ ވަނަ ދައުރު ނިމުމުން 2017 ވަނަ އަހަރު އޮބާމާ އާއި މިޝޭލް އުފެއްދެވި ހަޔާ ގްރައުންޑް ޕްރޮޑަކްޝަން ކުންފުނިން ނެޓްފްލިކްސްއާ އެކު އެއްބަސްވުމެއްގައި ސޮއިކުރި އެވެ.
އޮބާމާގެ ދިރިއުޅުމުގެ މައްޗަށް އުފެއްދެވި "ދަ އޮޑޭސިޓީ އޮފް ހޯޕް" އަދި "ޑްރީމްސް ފްރޮމް މައި ފާދާ" ގެ އޯޑިއޯ ވާޝަންއަށް އެމަނިކުފާނަށް ގްރެމީ އެވޯޑް ލިބިވަޑައިގެންނެވި އެވެ.
އޮބާމާގެ އިތުރުން އެމީ އެވޯޑް ހާސިލް ކުރައްވާފަައިވާ އެމެރިކާގެ ކުރީގެ ރައީސްއަކީ ޑްވައިޓް އައިސަންހޮވާ އެވެ. އެމަނިކުފާނަށް 1956 ވަނަ އަހަރު އެ އެވޯޑް ލިބިވަޑައިގެންނެވީ ޓީވީ ނިއުސް ކޮންފެރެންސެއް ބޭއްވެވި ފުރަތަމަ ރައީސްގެ ޝަރަފު ހޯއްދެވުމުންނެވެ.
